ڈی سی کا راشن دکانوں کے اچانک معائنہ اور ڈیٹا کی درستگی کا کام تیز کرنے کا حکم، کہا!

راشن کی تقسیم میں بے ضابطگیاں قطعی برداشت نہیں

جدید بھارت نیوز سروس
مشرقی سنگھ بھوم ،16؍مئی: مشرقی سنگھ بھوم ضلع میں راشن کی تقسیم کے نظام کو لے کر انتظامیہ نے سخت رخ اختیار کیا ہے۔ ڈپٹی کمشنر (ڈی سی) راجیو رنجن نے واضح طور پر کہا ہے کہ غذائی اجناس کی تقسیم میں کسی بھی قسم کی بے ضابطگی برداشت نہیں کی جائے گی اور خاطیوں کے خلاف سخت کارروائی ہوگی۔ انہوں نے ضلع اور بلاک سطح کے افسران کو پی ڈی ایس نظام کی مسلسل مانیٹرنگ اور جوابدہی یقینی بنانے کی ہدایت دی۔ کلکٹریٹ کے آڈیٹوریم میں ہفتہ کو محکمہ سپلائی کی ماہانہ جائزہ میٹنگ ڈپٹی کمشنر کی صدارت میں منعقد ہوئی۔ میٹنگ میں نیشنل فوڈ سیکیورٹی ایکٹ، جھارکھنڈ اسٹیٹ فوڈ سیکیورٹی اسکیم، پی وی ٹی جی (PVTG) خاندانوں کے لیے چلائی جا رہی ڈاکیا اسکیم، راشن کارڈ کی زیر التوا درخواستوں، ڈور اسٹیپ ڈلیوری، نمک کی تقسیم کی اسکیم اور مکھیا منتری چنا دال تقسیم اسکیم کا جائزہ لیا گیا۔ میٹنگ میں ضلع سپلائی افسر نے بتایا کہ صارفین کی تصدیق اور ڈیٹا کی درستگی کا کام تیزی سے چل رہا ہے۔ مشکوک بنیاد والے 22975 معاملات میں سے 22689 نام ہٹائے جا چکے ہیں۔ وہیں راشن کارڈ مینجمنٹ سسٹم کے تحت 16399 معاملات میں سے 5001 صارفین کے نام ہٹائے گئے ہیں، جبکہ 8384 صارفین اہل پائے گئے ہیں اور 3014 معاملات زیر التوا ہیں۔ غیر فعال راشن کارڈوں کے 164237 معاملات میں سے 147439 نام ہٹائے گئے ہیں۔ اس کے علاوہ ڈوپلی کیٹ صارفین کے 25321 معاملات میں سے 14417 نام ہٹائے جا چکے ہیں، جبکہ 6024 معاملات پر کارروائی جاری ہے۔ڈپٹی کمشنر راجیو رنجن نے ہدایت دی کہ جو لوگ طویل عرصے سے راشن نہیں لے رہے ہیں، ان کے نام نشان زد کر کے ہٹائے جائیں تاکہ اہل صارفین کو اسکیم کا فائدہ مل سکے۔ ڈاکیا اسکیم کے جائزے کے دوران پٹمدہ، پوٹکا اور گولموری-کم-جگسلائی بلاک کے کچھ علاقوں میں غذائی اجناس کی تقسیم زیر التوا ملنے پر ڈپٹی کمشنر نے ناراضگی کا اظہار کیا۔ انہوں نے کہا کہ قدیم قبائلی خاندانوں تک وقت پر راشن پہنچانا حکومت کی ترجیح ہے۔ انہوں نے بی ایس او کو ہدایت دی کہ ہر ماہ 10 تاریخ کے بجائے 5 تاریخ تک ہی غذائی اجناس کی تقسیم کو یقینی بنایا جائے۔ میٹنگ میں پی جی ایم ایس پورٹل اور ای آر سی ایم ایس کے تحت زیر التوا شکایات کا بھی جائزہ لیا گیا۔ڈپٹی کمشنر نے تمام معاملات کو وقت پر نمٹانے اور عوامی تقسیم کی دکانوں کے باقاعدہ اچانک معائنہ کی ہدایت دی۔ ساتھ ہی غذائی اجناس کے ذخیرہ اندوزی، اٹھاؤ اور نقل و حمل کے نظام کو مزید مضبوط کرنے پر زور دیا گیا۔
اس کے ساتھ ہی ڈی سی نے محکمہ عمارت سازی کو ہدایت دیتے ہوئے کہا کہ گوداموں کی مرمت کا زیر التوا کام اس ماہ کے آخر تک ہر حال میں پورا کیا جائے۔ میٹنگ میں اے ڈی ایم (ایس او آر) راہل آنند، ضلع سپلائی افسر ذوالفقار انصاری، محکمہ عمارت سازی کے ایگزیکٹو انجینئر، تمام بی ایس او، ایم او اور دیگر متعلقہ افسران موجود تھے۔