’دیشوم گرو شبو سورین رہائشی اسکول‘ کی تعمیر کیلئےاراضی کی نشاندہی اور کام جلد مکمل کرنے کی وزیر اعلیٰ کی ہدایت
جدید بھارت نیوز سروس
رانچی، 27 اپریل:۔وزیر اعلیٰ ہیمنت سورین نے آج جھارکھنڈ وزارت (پروجیکٹ بھون) میں اعلیٰ حکام کے ساتھ رانچی رنگ روڈ پر واقع جگوار کیمپس میں مجوزہ ’دیشوم گرو شبو سورین رہائشی اسکول‘ کمپلیکس کی تعمیر کے حوالے سے ایک اہم جائزہ میٹنگ کی۔ اس موقع پر حکام نے پاور پوائنٹ پریزنٹیشن کے ذریعے اسکول کے ڈیزائن، تعمیراتی خاکہ، دستیاب سہولیات اور مستقبل کے لائحہ عمل کے بارے میں وزیر اعلیٰ کو تفصیلی بریفنگ دی۔ میٹنگ کے دوران وزیر اعلیٰ نے ہدایت دی کہ اسکول کمپلیکس کے لیے جگوار کیمپس میں ہی جلد از جلد اراضی کی نشاندہی کا عمل مکمل کیا جائے۔ حکام نے بتایا کہ اسکول کی تعمیر کے لیے ڈی پی آر (DPR) تیار کر لی گئی ہے اور زمین کے انتخاب کا کام آخری مراحل میں ہے۔
معیاری تعلیم کی فراہمی ریاستی حکومت کی ترجیح
وزیر اعلیٰ ہیمنت سورین نے حکام پر زور دیا کہ اسکول کی تعمیر سے وابستہ تمام تکنیکی و انتظامی مراحل جلد مکمل کر کے مقررہ وقت پر کلاسز کا آغاز یقینی بنایا جائے۔ انہوں نے کہا کہ ریاست میں فرض کی ادائیگی کے دوران شہید ہونے والے پولیس اہلکاروں، فوج اور سی پی ایم ایف (CPMF) کے جوانوں کے بچوں کو بہترین تعلیم فراہم کرنا حکومت کی اولین ترجیح ہے۔ وزیر اعلیٰ نے اسکول میں جدید انفراسٹرکچر، اسمارٹ کلاس رومز، لائبریری، آئی سی ٹی لیب اور کھیلوں کی بین الاقوامی معیار کی سہولیات فراہم کرنے کی ہدایت دی۔
’اسکول آف ایکسیلنس‘ کے معیار پر ہوگی تعمیر
وزیر اعلیٰ نے واضح کیا کہ دیشوم گرو شبو سورین رہائشی اسکول کا معیار ’اسکول آف ایکسیلنس‘ کے مطابق ہونا چاہیے۔ چھٹی سے بارہویں جماعت تک کے طلبہ و طالبات کے لیے علیحدہ اور محفوظ ہاسٹل کے ساتھ ساتھ جدید رہائشی سہولیات کو یقینی بنایا جائے۔ انہوں نے کہا کہ تعلیمی ماحول ایسا ہو جو طلبہ کی ہمہ جہت ترقی میں معاون ثابت ہو۔
جے اے پی-10 ہوٹوار میں پولیس اہلکاروں کیلئے اسپتال
میٹنگ میں پولیس خاندانوں کے لیے جے اے پی-10 ہوٹوار، رانچی میں مجوزہ اسپتال کے قیام پر بھی تبادلہ خیال کیا گیا۔ حکام نے بتایا کہ یہ اسپتال پبلک پرائیویٹ پارٹنرشپ (PPP) موڈ پر چلایا جائے گا۔ ابتدائی طور پر یہ 50 بستروں پر مشتمل ہوگا، جسے ضرورت پڑنے پر 100 بستروں تک وسعت دی جائے گی۔ وزیر اعلیٰ نے ہدایت دی کہ اسپتال میں ماہر ڈاکٹروں اور جدید طبی آلات کی دستیابی یقینی بنائی جائے تاکہ پولیس اہلکاروں کے اہل خانہ کو علاج کے لیے بھٹکنا نہ پڑے۔ جائزہ میٹنگ میں چیف سکریٹری اویناش کمار، ایڈیشنل چیف سکریٹری (داخلہ) وندنا دادیل، ایڈیشنل چیف سکریٹری (صحت) اجے کمار سنگھ، ڈی جی پی تداشا مشرا، سکریٹری (تعلیم) اما شنکر سنگھ، اے ڈی جی ہیڈ کوارٹر منوج کوشک، ڈی آئی جی جگوار انوپ برتھرے، ڈی آئی جی بجٹ سندھیا رانی مہتا اور دیگر اعلیٰ حکام شریک تھے۔
