ریاستی سطحی کمیٹی کے اجلاس میں 5 سے 20 لاکھ روپے تک کے معاملات پر فیصلہ
جدید بھارت نیوز سروس
رانچی، 21 جنوری:۔ سنگین بیماریوں میں مبتلا مریضوں کے لیے ریاستی حکومت کی وزیراعلیٰ سنگین بیماری علاج منصوبہ کے تحت بڑی راحت کی خبر سامنے آئی ہے۔ ضلعی سطحی کمیٹی کی جانب سے پانچ لاکھ سے زائد اور بیس لاکھ روپے تک کی امداد کی سفارشات پر غور کے لیے ریاستی سطحی کمیٹی کا ایک اہم اجلاس منعقد ہوا، جس میں مجموعی طور پر 18 مریضوں کو علاج کے لیے مالی امداد فراہم کرنے کی منظوری دی گئی۔
ریاستی سطحی اجلاس
یہ اجلاس جھارکھنڈ اسٹیٹ آروگیہ سوسائٹی کے ایگزیکٹو ڈائریکٹر چھوی رنجن کی صدارت میں منعقد ہوا۔ اجلاس میں ڈائریکٹر ہیلتھ سروسز ڈاکٹر سدھارتھ سانیال، ایڈیشنل ایگزیکٹو ڈائریکٹر سیما سنگھ، جنرل منیجر جساَس پروین چندر مشرا سمیت محکمہ صحت کے سینئر افسران اور اندرونی مالیاتی مشیر موجود تھے۔
سنگین امراض کے معاملات پر غور
اجلاس کے دوران کینسر، کڈنی ٹرانسپلانٹ، بلڈ کینسر اور دیگر پیچیدہ بیماریوں میں مبتلا 18 مریضوں کے معاملات پر تفصیلی تبادلہ خیال کیا گیا۔ ضلعی سطحی کمیٹی کی جانب سے تجویز کردہ طبی امداد کی رقم کو ریاستی سطحی کمیٹی نے متفقہ طور پر منظوری دے دی۔
ایک معاملہ کابینہ کو بھیجا گیا
ایک مریض کے علاج پر دس لاکھ روپے سے زائد، تقریباً سولہ لاکھ روپے کے اخراجات کو مدنظر رکھتے ہوئے معاملہ کابینہ کی منظوری کے لیے بھیجنے کا فیصلہ کیا گیا۔
تصدیقی عمل مزید سخت
اجلاس میں تصدیقی عمل کو مزید سخت بنانے کی ہدایت دی گئی۔ ایگزیکٹو ڈائریکٹر چھوی رنجن نے بتایا کہ بعض اضلاع سے موصولہ درخواستوں میں مریض کی موجودہ طبی حالت کی واضح جانکاری درج نہیں ہے۔ انہوں نے ہدایت دی کہ تمام سول سرجن خود یا نامزد افسر کے ذریعے مریضوں کا جسمانی تصدیق عمل مکمل کریں گے، جبکہ ضرورت پڑنے پر ویڈیو کانفرنسنگ کے ذریعے بھی تصدیق کی جائے گی۔
منصوبہ کی ترجیح
ریاستی حکومت نے واضح کیا کہ وزیراعلیٰ سنگین بیماری علاج منصوبہ کے تحت معاشی طور پر کمزور اور سنگین بیماریوں میں مبتلا مریضوں کو بروقت اور مؤثر علاج فراہم کرنا حکومت کی اولین ترجیح ہے۔
منظور شدہ مریض
منظور شدہ مریضوں میں کینسر سے متاثرہ سریتا دیوی، شاہینہ پروین، پریش کمار شرما، لکشمی ناتھ ساہو، لیلون خاتون، اوشا شرما، جبسانا کیبرتا، محمد ہارون رشید، افسانہ خاتون، ماسٹر دیویانشو کمار، اجمل انصاری، ارملا کروآ، سلمیٰ پروین اور نرگس آرا شامل ہیں۔ کڈنی ٹرانسپلانٹ کے معاملات میں مندیپ کمار، جیتبہن مچھوا اور آدتیہ کمار کو امداد دی گئی ہے، جبکہ بلڈ کینسر میں مبتلا مس راج نندنی کماری کے علاج کی بھی منظوری دی گئی ہے۔
