گورنر نے قبائلی، دلت اور پسماندہ طبقات کیلئےزیر التواء وظائف پر تشویش کا اظہار کیا
جدید بھارت نیوز سروس
رانچی، 4؍ دسمبر: آجسو اسٹوڈنٹس یونین کے ایک وفد نے جمعرات کو گورنر سے ملاقات کی اور طلبا کی زیر التوا ادائیگیوں کو جاری کرنے کا مطالبہ کیا۔ وفد نے گورنر کو ایک میمورنڈم پیش کیا، جس میں ایس ٹی، ایس سی، اور او بی سی طلباء کے لیے وظائف فوری جاری کرنے کا مطالبہ کیا۔ اے جے ایس یو قائدین نے گورنر کو بتایا کہ اسکالرشپ کی عدم ادائیگی کی وجہ سے قبائلی، دلت اور پسماندہ طبقے کے طلباء جز وقتی ملازمتیں کرنے پر مجبور ہیں کیونکہ وہ غریب خاندانوں سے آتے ہیں۔ ملاقات کے دوران گورنر نے طلباء کے نمائندوں کی بات غور سے سنی اور انہیں یقین دلایا کہ طلباء کے تحفظات کو دور کرنے کے لئے فوری کارروائی کی جائے گی اور متعلقہ محکمے سے اسکالرشپ کی ادائیگیوں کے حوالے سے معلومات حاصل کرنے کے بعد ضروری کارروائی کی جائے گی۔ وفد میں اے جے ایس یو اسٹوڈنٹس یونین کے ریاستی صدر اوم ورما، ایگزیکٹیو صدر ببلو مہتو، سینئرنائب صدر رتوراج شاہ دیو، پیوش چودھری، راج کشور مہتو، اور پرتاپ سنگھ شامل تھے۔ معلوم ہو کہ اے جے ایس یو اسٹوڈنٹ یونین اسکالرشپ کے معاملے کو لے کر کئی دنوں سے احتجاج کر رہی ہے اور حال ہی میں اس نے راج بھون کے سامنے ’’بیگنگ فار ایجوکیشن: پبلک اینگر مارچ‘‘ کے ذریعے زبردست مظاہرہ کیا۔ تاہم گورنر کے ریاست سے باہر ہونے کی وجہ سے اس وقت میمورنڈم پیش نہیں کیا جاسکا۔ AJSU کی درخواست کے بعد جمعرات کو ایک میٹنگ طے کی گئی۔
