اشتیاق الرحمن کی سول سروس امتحان میں کامیابی پر رانچی میں خوشی کی لہر

جدید بھارت نیوز سروس
رانچی، 6؍ مارچ: رانچی کے ڈورنڈا واقع منی ٹولا، فردوس نگر کے رہائشی اشتیاق الرحمن نے اس سال سول سروس امتحان میں کامیابی حاصل کر کے شہر کا نام روشن کیا ہے۔ انہیں اس باوقار امتحان میں 354واں رینک حاصل ہوا ہے۔ ان کی اس کامیابی سے پورے رانچی شہر، خاص طور پر مسلم معاشرے میں خوشی اور فخر کا ماحول ہے۔ اس سلسلے میں ‘فرینڈز آف ویکر سوسائٹی ‘ کے صدر تنویر احمد نے ایک پریس بیان جاری کرتے ہوئے کہا کہ اشتیاق الرحمن کی یہ کامیابی رانچی کے نوجوانوں کے لیے ایک بڑی تحریک ہے۔ انہوں نے کہا کہ اشتیاق الرحمن گزشتہ تقریباً چھ ماہ سے حیدرآباد میں وزارت داخلہ کے تحت حیدرآباد ایئرپورٹ پر امیگریشن آفیسر کے عہدے پر فائز ہیں اور اب سول سروس امتحان میں کامیابی حاصل کر کے انہوں نے اپنے خاندان، معاشرے اور پورے رانچی شہر کا سر فخر سے بلند کر دیا ہے۔ تنویر احمد نے کہا کہ یہ کامیابی اس بات کا ثبوت ہے کہ اگر نوجوان محنت، لگن اور صحیح سمت میں تیاری کریں تو وہ کسی بھی مقام کو حاصل کر سکتے ہیں۔ انہوں نے کہا کہ اشتیاق الرحمن کی کامیابی ان تمام طلبہ کے لیے ایک مثالی نمونہ ہے جو سول سروس جیسے مشکل امتحان کی تیاری کر رہے ہیں۔انہوں نے رانچی کے طلبہ اور والدین سے اپیل کی کہ وہ اپنے بچوں کو اعلیٰ تعلیم اور مسابقتی امتحانات کی تیاری کے لیے راغب کریں، تاکہ مستقبل میں مزید نوجوان ملک کی اعلیٰ ترین خدمات میں شامل ہو کر معاشرے اور ملک کی خدمت کر سکیں۔ آخر میں تنویر احمد نے اشتیاق الرحمن اور ان کے اہل خانہ کو اس تاریخی کامیابی پر دلی مبارکباد اور نیک خواہشات پیش کیں اور ان کے تابناک مستقبل کے لیے دعا کی۔