رانچی میں خریف سیزن کی تیاریوں اور زرعی اسکیموں کا جائزہ اجلاس منعقد

کسانوں کو معیاری بیج و کھاد کی بروقت فراہمی یقینی بنانے کی ہدایت

ڈی سی نے زرعی، ماہی پروری اور ڈیری اسکیموں کے شفاف نفاذ پر زور دیا

جدید بھارت نیوز سروس
رانچی ، 27؍مئی: ضلع مجسٹریٹ و ڈپٹی کمشنر، رانچی منجوناتھ بھجنتری کی صدارت میں محکمہ زراعت، مویشی پروری و کوآپریٹو، ماہی پروری اور ڈیری ڈیولپمنٹ کے زیر اہتمام چلائی جا رہی اسکیموں کا ایک جائزہ اجلاس منعقد کیا گیا۔ اجلاس میں ڈسٹرکٹ ایگریکلچر آفیسر، ڈسٹرکٹ کوآپریٹو آفیسر، ڈسٹرکٹ فشریز آفیسر اور ڈسٹرکٹ اینیمل ہسبینڈری اینڈ ڈیری ڈیولپمنٹ آفیسر سمیت متعلقہ افسران موجود تھے۔اجلاس میں خریف کے سیزن کی تیاریوں، بارش کی صورتحال، بلاک وائز فصلوں کی بوائی کے ہدف، بیج اور کھاد کی دستیابی، آبپاشی، مٹی کے تحفظ (سوائل کنزرویشن)، مویشی پروری و ڈیری اور ماہی پروری سے متعلق اسکیموں کا تفصیلی جائزہ لیا گیا۔جائزے کے دوران ڈسٹرکٹ ایگریکلچر آفیسر نے بتایا کہ اس سال اپریل کے مہینے میں3.35ملی میٹر اور مئی کے مہینے میں اب تک 7.77 ملی میٹر بارش درج کی گئی ہے۔ ڈپٹی کمشنر منجوناتھ بھجنتری نے بارش کی موجودہ صورتحال کو مدنظر رکھتے ہوئے خریف کی فصل کی تیاریوں کو وقت پر یقینی بنانے کی ہدایت دی۔ انہوں نے سال 27-2026 کے لیے دھان کی فصل کے بلاک وائز بوائی کے ہدف کا جائزہ لیتے ہوئے تمام بلاکس میں مقررہ ہدف کے مطابق کاشتکاری یقینی بنانے کو کہا۔ اس کے ساتھ ہی تلہن (تیل دار اجناس) اور موٹے اناج کی فصلوں کی بوائی کے ہدف کا بھی جائزہ لیا گیا اور ان کی پیداوار کو فروغ دینے کے لیے ضروری کارروائی کرنے کی ہدایت دی گئی۔اجلاس میں خریف کی فصل کے لیے بیجوں کی ضرورت اور دستیابی کا جائزہ لیتے ہوئے ڈپٹی کمشنر نے کسانوں کو وقت پر معیاری بیج فراہم کرنے کی ہدایت دی۔ انہوں نے کہا کہ کسانوں کو کسی قسم کی پریشانی نہیں ہونی چاہیے اور تقسیم کا عمل شفاف اور منظم ہونا چاہیے۔
کھاد کی دستیابی کے جائزے کے دوران معلومات دی گئیں کہ ضلع میں 12 ہول سیلرز اور تقریباً 150 ریٹیلرز سرگرم عمل ہیں۔ ضلع مجسٹریٹ مع ڈپٹی کمشنر منجوناتھ بھجنتری نے ہدایت دی کہ تمام کسانوں کو مناسب مقدار میں کھاد فراہم کی جائے۔ انہوں نے کھاد کی بلیک مارکیٹنگ (کالا بازاری) اور مصنوعی بحران کے خدشے کے پیش نظر مسلسل نگرانی رکھنے کی ہدایت دی۔ ساتھ ہی اسٹاک کی باقاعدہ مانیٹرنگ کے لیے مجسٹریٹ کی تعیناتی یقینی بنانے کو کہا۔مٹی کے تحفظ اور مٹی کی جانچ (سوائل ٹیسٹنگ) کا جائزہ لیتے ہوئے ضلع مجسٹریٹ مع ڈپٹی کمشنر منجوناتھ بھجنتری نے سوائل کنزرویشن کے کاموں میں تیزی لانے کی ہدایت دی۔ انہوں نے کسانوں کے لیے زیادہ سے زیادہ سوائل ٹیسٹنگ کرانے اور سوائل ہیلتھ کارڈ کی تقسیم کو یقینی بنانے کے لیے کہا تاکہ کسان سائنسی طریقے سے کھیتی باڑی کر سکیں۔
اجلاس میں کسان کال سینٹر میں موصول ہونے والی شکایات کا بھی جائزہ لیا گیا۔ ضلع مجسٹریٹ مع ڈپٹی کمشنر منجوناتھ بھجنتری نے ہدایت دی کہ کسانوں سے متعلق شکایات کا تیز رفتار اور مؤثر ازالہ یقینی بنایا جائے۔پردھان منتری کرشی سنچائی یوجنا کے تحت ڈرپ اریگیشن (قطرہ قطرہ آبپاشی) کی اسکیموں کا جائزہ لیتے ہوئے ڈپٹی کمشنر نے پانی کے تحفظ اور جدید آبپاشی کے نظام کو فروغ دینے پر زور دیا۔ انہوں نے زیادہ سے زیادہ کسانوں کو اس اسکیم سے جوڑنے کی ہدایت دی۔مکھیا منتری پشودھن وکاس یوجنا کے جائزے کے دوران ڈپٹی کمشنر نے اسکیموں کے مؤثر نفاذ اور مستحقین کے انتخاب میں مکمل شفافیت یقینی بنانے کی ہدایت دی۔ انہوں نے کہا کہ اسکیموں کا فائدہ صرف حقیقی اور اہل مستحقین کو ہی ملنا چاہیے۔محکمہ ماہی پروری کی مختلف اسکیموں کے جائزے کے دوران تالابوں کی تعمیر اور ان کی مرمت و بحالی کے کاموں پر تبادلہ خیال کیا گیا۔ ڈپٹی کمشنر نے ہدایت دی کہ تالابوں کی گہرائی مقررہ معیار کے مطابق یقینی بنائی جائے تاکہ مچھلی کی پیداوار میں اضافہ ہو سکے۔محکمہ ڈیری ڈیولپمنٹ کے تحت چلائی جانے والی اسکیموں کا جائزہ لیتے ہوئے ڈپٹی کمشنر نے ڈیری اور مویشی پروری کی سرگرمیوں کو فروغ دینے پر زور دیا۔ انہوں نے اسکیموں کے کامیاب نفاذ اور مستحقین کے انتخاب کے عمل میں شفافیت برقرار رکھنے کی ہدایت دی۔ڈپٹی کمشنر نے تمام متعلقہ محکموں کو باہمی تال میل کے ساتھ کام کرنے اور کسانوں و دیہی مستحقین کو اسکیموں کا زیادہ سے زیادہ فائدہ پہنچانے کے لیے حساسیت اور مستعدی کے ساتھ کام کرنے کی ہدایت دی۔