پٹنہ: بہار میں لوک سبھا انتخابات کے دوسرے مرحلہ کے لئے ووٹنگ سے قبل تشدد کا واقعہ پیش آیا ہے۔ پٹنہ میں بدھ کی شب جے ڈی یو لیڈر کا گولی مار کر قتل کر دیا گیا۔ نیوز پورٹل ’این ڈی ٹی وی‘ کے مطابق جے ڈی یو کے لیڈر پر اس وقت فائرنگ کی گئی جب ہو ایک شادی کی تقریب میں شرکت کے بعد واپس لوٹ رہے تھے۔
یہ واقعہ پٹنہ کے پونپون علاقہ میں پیش آیا۔ واقعہ کے دوران سوربھ کمار کے ساتھ موجود شخص کو بھی گولی لگی ہے۔ جے ڈی یو لیڈر کے قتل کے بعد حامیوں میں بھاری غم و غصہ پایا جا رہا ہے۔ مشتعل حامیوں نے کافی ہنگامہ کیا۔
سوربھ کمار نتیش کمار کی پارٹی جنتا دل یونائیٹڈ (جے ڈی یو) کے نوجوان لیڈر تھے۔ رپورٹ کے مطابق انہیں بائیک سوار چار افراد نے گولیوں کا نشانہ بنایا۔ سوربھ کمار کے سر میں دو گولی ماری گئی۔ جبکہ ان کے ساتھ مُنمُن کو تین گولی مار گئی۔ زخمی حالت میں دونوں کو اسپتال میں داخل کرایا گیا۔ ڈاکٹروں نے سوربھ کمار کو مردہ قرار دے دیا اور ان کے ساتھ مُنمُن کا سنگین حال میں علاج چل رہا ہے۔
واقعہ کی اطلاع موصول ہونے کے ساتھ ہی دیر رات گئے پٹنہ پولیس کی خصوصی ٹیم موقع پر پہنچی اور تفتیش شروع کر دی۔ قتل کے بعد مشتعل لوگوں نے سڑک پر جام لگا دیا۔ ے ڈی یو لیڈر کے قتل کی خبر موصول ہوتے ہی آر جے ڈی کے لیڈر لالو پرساد یادو کی بیٹی میسا بھارتی بھی پونپون پہنچیں اور متاثرہ کنبہ سے ملاقات کی۔
