امریکہ میں زیر حراست وینزویلا کے صدر نکولس مادورو کی ویڈیو ریلیز

واشنگٹن، 4 جنوری (یو این آئی)امریکہ نے ایک ویڈیو ریلیز کی ہے جس میں گرفتار وینزویلا کے صدر نکولس مادورو کو ہتھکڑیوں میں دکھایا گیا ہے۔ جب انہیں حراست میں لے جایا جارہا تھا تو وہ “پرپ واک” کر رہے تھے۔مادورو کو نیویارک شہر کے میٹروپولیٹن ڈیٹینشن سینٹر (ایم ڈی سی) منتقل کیا جائے گا ۔ سی این این کی رپورٹ کے مطابق اس حراستی مرکز کو “انتہائی خراب جیل ” اور حالات کو “خوفناک” قرار دیا گیا ہے۔وائٹ ہاؤس کے سرکاری ریپڈ رسپانس اکاؤنٹ سے اس ویڈیو کو پوسٹ کیا گیا ہے جس میں وینزویلا کے رہنما نکولس مادورو کو ہتھکڑیوں میں دکھایا گیا ہے۔ ویڈیو کے ساتھ لکھا گیا: “پرپ واک۔” ویڈیو میں مادورو سیاہ ہوڈی پہنے ایک راہداری میں چلتے نظر آئے ۔ مادورو کو مین ہیٹن میں ڈرگ انفورسمنٹ ایڈمنسٹریشن کے دفتر میں باضابطہ طور پر رجسٹر کیا گیا اور ان کے فنگر پرنٹس لیے گئے۔جیلوں میں بڑھتی بھیڑ سے نمٹنے کے لیے 1990 کی دہائی میں تعمیر کیے گئے ایم ڈی سی میں اس سے قبل بھی کئی نمایاں شخصیات کو رکھا جاچکا ہے۔مادورو اور ان کی اہلیہ کو قید کئے جانے کے چند ہی گھنٹوں بعد وینزویلا کی اپوزیشن کو جشن مناتے ہوئے دیکھا گیا۔تاہم امریکی صدر ڈونالڈ ٹرمپ نے اپوزیشن رہنما اور قومی اسمبلی کی سابق رکن ماریا کورینا ماچادو پر عدم اعتماد کا اظہار کیا اور اشارہ دیا کہ وہ اس کے بجائے مادورو کی حامی نائب صدر ڈیلسی روڈریگز کے ساتھ کام کریں گے۔ ماچادو نے ایڈمنڈو گونزالیز اُروتیا کو فوری طور پر صدر بنانے کا مطالبہ کیا تھا۔