امریکہ کے 145فیصدٹیرف کے بعد چین کی جوابی کارروئی،لگایا125فیصد محصول
واشنگٹن ، 11 اپریل (یو این آئی) امریکی صدر ڈونلڈ ٹرمپ نے چین کے ساتھ مزاکرات کا عندیہ دے دیا اور کہا چین کے ساتھ معاہدہ کرناپسند کروں گا۔واشنگٹن میں امریکی صدرڈونلڈٹرمپ نے کابینہ اجلاس سے خطاب کرتے ہوئے کہا کہ محصولات سے حاصل رقم سےقرض چکائیں گے، دنیا کے کئی ملک ہم سے بات چیت کےلیے تیار ہو چکے ہیں۔صدرٹرمپ نے چین کے ساتھ مزاکرات کا عندیہ دیتے ہوئے کہا کہ چین کےساتھ معاہدہ کرناپسند کروں گا، اگرمعاہدہ نہیں ہوتاتو ہم وہیں کھڑے ہونگےجہاں پہلے تھے۔ان کا کہنا تھا کہ چین کئی عرصے سے ہم سے فائدہ اٹھا رہا لیکن چینی صدر سمجھدار انسان اور میرے بہت اچھے دوست ہیں ، دونوں ممالک اچھا معاہدہ کرنے میں کامیاب ہو جائیں گے۔امریکی صدر نے کہا کہ دنیا نے تجارت کے معاملے پر ہم سے انصاف نہیں کیا، کل کا دن زبردست تھا،کل کا دن تاریخی دن تھا، اب سب چیزیں بہتری کی طرف جارہی ہیں، مقصد حاصل کرلیا، مہنگائی ،بیروزگاری، شرح سود میں کمی ہورہی ہے۔انہوں نے ایک بار پھر غزہ سے اسرائیلی یرغمالیوں کی واپسی کے وعدہ کیا اور کہا کہ غزہ سے یرغمالیوں کو واپس لانے کے قریب ہیں، اسرائیل اور حماس دونوں سے بات چیت کررہے ہیں۔واضح رہے کہ زیادہ تر چینی درآمدات پر ٹیرف کی شرح 145 فیصد ہے، بدھ کو صدر ٹرمپ نے چین سے آنے والی اشیاء پر 125 فیصد کی نئی لیوی کا اعلان کیا تھا، ایک سو پچیس فیصد شرح پہلے سے موجودہ بیس فیصد لیوی کے اوپر ہے۔ چین اور امریکہ کے درمیان تجارتی جنگ رکتی نظر نہیں آرہی ہے بلکہ گزرتے دن کےساتھ اس میں مزید شدت آتی جارہی ہے ۔امریکہ نے چین پر مجموعی طورپر 145فیصد ٹیرف عائد کیاتھا اور اب چین نے جوابی کارروائی کرتے ہوئے امریکہ سے درآمدہونے والی مصنوعات پر 125فیصد کا محصول لگادیاہے ۔چین نے ایک بار پھر امریکا سے درآمد کی جانے والی مصنوعات پر ٹیرف بڑھا دیا ہے۔ اب یہ اضافی چارج 125 فیصد ہوگا۔واضح رہے کہ اس سے قبل بدھ کو چین نے امریکی اشیاء پر 84 فیصد ٹیرف لگانے کا اعلان کیا تھا۔چین کی جانب سے عائد کردہ نئے ٹیرف کی شرحیں ہفتے سے نافذ العمل ہوں گی۔ساتھ ہی چین نے یہ بھی کہا ہے کہ اگر امریکہ اس کے بعد بھی محصولات بڑھاتا ہے تو وہ جوابی کارروائی نہیں کرے گا۔پچھلے ہفتے، امریکی صدر ٹرمپ نے چین پر اضافی 34 فیصد ٹیرف کا اعلان کیا تھا ۔ اس کا اطلاق 9 اپریل سے ہونا تھا لیکن اس سے چند گھنٹے قبل ٹرمپ نے مزید 50 فیصد ٹیرف میں اضافے کا اعلان کردیاتھا۔ اس کے جواب میں چین نے بدھ کو امریکی اشیا پر محصولات کو 50 فیصد سے بڑھا کر 84 فیصد کر دیا تھا ۔جمعرات کو، امریکہ نے چین پر 145 فیصد ٹیرف کا اعلان کیاتھا اور دوسرے ممالک کو 90 دن کی مہلت دیتے ہوئے یکساں ٹیرف کو 10 فیصد پر برقرار رکھاتھا۔
