روس کا سیورسک شہر پر قبضے کا دعویٰ، یوکرین نے کیا مسترد

ماسکو، 12 دسمبر (یو این آئی) روس نے یوکرین کے سیورسک شہر پر مکمل کنٹرول حاصل کرنے کا دعویٰ کیا ہے، لیکن یوکرین نے اس دعوے کو مسترد کر دیا ہے۔واضح رہے کہ کئی ماہ کی شدید لڑائی کے بعد تباہ ہو چکا یہ شہر دونوں فوجوں کے لیے اسٹریٹجک اہمیت کا معاملہ ہے۔ روسی نیوز ایجنسی ’اسپوتنک‘ کی رپورٹ کے مطابق جنرل اسٹاف کے چیف والیری گیراسیموف نے روسی صدر ولادیمیر پوتن کو اطلاع دی کہ فوج نے سیورسک پر قبضہ کر لیا ہے۔یہ شہر روس کی لُہانسک اور دونیتسک پیپلز ریپبلکس کے سرحدی علاقوں پر مکمل کنٹرول حاصل کرنے کی کوششوں کے لیے انتہائی اہم سمجھا جاتا ہے۔ دونیتسک کے باقی علاقوں پر قبضہ کرنے کی روسی مہم میں سیورسک طویل عرصے سے ایک اہم ہدف رہا ہے۔تاہم یوکرین نے روس کے اس دعوے کو بے بنیاد قرار دیتے ہوئے کہا ہے کہ شہر اب بھی اس کے قبضے میں ہے۔ یوکرین کی مسلح افواج کی آپریشن ٹاسک فورس ایسٹ نے فیس بک پر لکھا کہ ’’سلوویانسک سمت میں شہر یوکرین کی مسلح افواج کے کنٹرول میں ہے۔‘‘