ایران میں ریسکیو آپریشن، موساد کی امریکی پائلٹس کی بازیابی میں شمولیت کا انکشاف

تل ابیب، 7 اپریل (یواین آئی) اسرائیل میں تعینات امریکی سفیر مائیک ہکابی نے انکشاف کیا ہے کہ ایران میں گرنے والے امریکی لڑاکا طیارے کے پائلٹس کی تلاش اور بازیابی کے آپریشن میں موساد نے اسرائیلی فوج کے ساتھ مل کر کردار ادا کیا۔مائیک ہکابی نے سوشل میڈیا پلیٹ فارم “ایکس” پر بتایا کہ انہوں نے اسرائیلی وزیرِ اعظم بنجمن نیتن یاہو سے ملاقات کی اور امریکی عوام کی جانب سے اس تعاون پر شکریہ ادا کیا۔ان کے مطابق اسرائیلی انٹیلی جنس ادارے موساد اور اسرائیلی دفاعی افواج نے ایرانی حدود میں امریکی طیارے کے عملے کو بچانے کے مشن میں نمایاں معاونت فراہم کی۔اس سے قبل عسکری جریدے “ملٹری واچ” نے رپورٹ کیا تھا کہ اس ریسکیو آپریشن کے دوران امریکہ اور اسرائیل کو مجموعی طور پر تقریباً 11 طیاروں کا نقصان اٹھانا پڑا۔یاد رہے کہ دو نشستوں والا ایف-15 ای لڑاکا طیارہ 3 اپریل کو ایران میں گر کر تباہ ہوا تھا، جس کے پائلٹ اور نیوی گیٹر پیراشوٹ کے ذریعے باہر نکلنے میں کامیاب ہو گئے تھے۔ویب سائٹ ایکسیس کے مطابق پائلٹ کو طیارہ گرنے کے چند گھنٹوں بعد ہی محفوظ مقام پر منتقل کر دیا گیا تھا، جبکہ نیوی گیٹر کی تلاش میں ایک دن سے زائد وقت لگا۔رپورٹس کے مطابق ریسکیو آپریشن کے دوران ایران نے ایک امریکی بلیک ہاک ہیلی کاپٹر کو بھی نشانہ بنایا، جس سے اس کا عملہ زخمی ہوا، تاہم ہیلی کاپٹر واپس آنے میں کامیاب رہا۔نیوی گیٹر کو بچانے کے لیے شروع کی گئی کارروائی کے دوران امریکی فضائیہ نے خطے میں ایرانی افواج کو نشانہ بنایا تاکہ سپیشل فورسز کے پہنچنے سے پہلے خطرات کو کم کیا جا سکے۔یہ پیش رفت ایسے وقت میں سامنے آئی ہے جب خطے میں کشیدگی میں مسلسل اضافہ ہو رہا ہے اور امریکہ و اسرائیل کی مشترکہ کارروائیوں پر نئی تفصیلات سامنے آ رہی ہیں۔