یوکرین کے شہروں پر بغیر کسی وجہ کے میزائل اور ڈرون گرائے جا رہے ہیں
واشنگٹن 27 مئی (ایجنسی) صدر ڈونلڈ ٹرمپ نے روسی رہنما ولادیمیر پوتن پر شدید ترین تنقید کرتے ہوئے واضح کیا کہ اس معاملے میں ان کا صبر جواب دینے لگا ہے۔ ماسکو نے کئیف اور یوکرین کے دیگر شہروں کو مسلسل تیسری رات ڈرون اور میزائلوں سے نشانہ بنایا۔ٹرمپ نے اتوار کی رات ایک سوشل میڈیا پوسٹ میں لکھا، “میرے پوتن کے ساتھ ہمیشہ سے بہت اچھے تعلقات رہے ہیں لیکن انہیں کچھ ہو گیا ہے، وہ بالکل پاگل ہو گئے ہے!””یوکرین کے شہروں پر میزائل اور ڈرون گرائے جا رہے ہیں بغیر کسی وجہ کے،” اس طرف اشارہ کرتے ہوئے ٹرمپ نے کہا کہ پوتن “خواہ مخواہ بہت زیادہ لوگوں کو مار رہے ہیں۔”یوکرینی حکام کے مطابق فروری 2022 میں روس کے مکمل حملے کے بعد یہ سب سے بڑا فضائی حملہ تھا۔ اس میں کم از کم 12 افراد ہلاک اور درجنوں زخمی ہوئے۔امریکی صدر نے خبردار کیا کہ اگر پوتن پورا یوکرین فتح کرنا چاہتے ہیں تو یہ “روس کے زوال کا باعث بنے گا!” لیکن ٹرمپ نے یوکرین کے صدر ولادیمیر زیلنسکی کے لیے بھی مایوسی کا اظہار کرتے ہوئے کہا، وہ “جس طرح سے بات کرتے ہیں، اس سے ان کے ملک کا کوئی فائدہ نہیں ہو گا۔”ٹرمپ نے سوشل میڈیا پر لکھا، “ان کی زبان سے نکلنے والی ہر چیز مسائل کا باعث بنتی ہے، مجھے یہ پسند نہیں اور بہتر ہے کہ یہ رک جائے”۔صدر نے پوتن اور اب تین سال پرانے تنازعے کو حل کرنے میں ناکامی پر کافی غصے کا اظہار کیا ہے۔ انہوں نے وائٹ ہاؤس واپسی کی مہم کے دوران وعدہ کیا تھا کہ وہ فوری طور پر یہ تنازعہ ختم کروا دیں گے۔انہوں نے طویل عرصے سے پوتن کے ساتھ اپنے دوستانہ تعلقات پر فخر کا اظہار کیا اور بار ہا اس بات پر زور دیا تھا کہ یوکرین سے زیادہ روس امن معاہدہ طے کرنے کے لیے آمادہ تھا۔لیکن گذشتہ مہینے کئیف پر روس کے مہلک حملوں کی بوچھاڑ کے بعد ٹرمپ نے پوتن پر زور دیا کہ وہ یوکرین پر حملے “روک دیں!” اور انہوں نے بارہا اس بات پر ناراضی کا اظہار کیا کہ یوکرین میں جنگ جاری ہے۔ٹرمپ نے اتوار کی صبح شمالی نیو جرسی سے روانگی کے وقت صحافیوں کو بتایا، “میں پوتن کے عمل سے خوش نہیں ہوں۔ وہ بہت زیادہ لوگوں کو مار رہے ہیں۔ میں نہیں جانتا انہیں کیا ہوا ہے۔ میں انہیں ایک طویل عرصے سے جانتا ہوں، ہمیشہ ان سے اچھے تعلقات رہے ہیں لیکن وہ شہروں میں راکٹ چلا کر لوگوں کو مار رہے ہیں اور مجھے یہ بالکل پسند نہیں ہے۔”روس اور یوکرین کے درمیان امن معاہدہ بدستور مبہم ہے۔ ٹرمپ اور پوتین نے گذشتہ ہفتے فون پر بات کی اور ٹرمپ نے کال کے بعد اعلان کیا تھا کہ روس اور یوکرین “فوری طور پر” جنگ بندی مذاکرات شروع کریں گے۔ فون پر یہ گفتگو اس وقت ہوئی جب روسی اور یوکرینی حکام نے 2022 کے بعد پہلی بار روبرو مذاکرات کے لیے ترکی میں ملاقات کی۔ لیکن جمعرات کو کریملن نے کہا کہ کوئی براہِ راست مذاکرات طے نہیں ہوئے۔پوتن کے جنگ بندی پر رضامندی سے انکار کے جواب میں یورپی یونین نے رواں ماہ روس پر نئی پابندیاں عائد کی ہیں۔ اگرچہ ٹرمپ نے روس پر پابندیاں اور محصولات بڑھانے کی دھمکی دی ہے لیکن انہوں نے تاحال اس پر عمل نہیں کیا ہے۔
