لندن برینٹ 2.67 فیصد، امریکی ڈبلیو ٹی آئی خام تیل 3.11 فیصد مزید مہنگا

لندن، 14 مارچ (یو این آئی) امریکہ اسرائیل ایران جنگ کے باعث بین الاقوامی مارکیٹوں میں خام تیل کی قیمتوں میں اضافہ جاری ہے۔لندن برینٹ 2.67 فی صد اضافے سے 103 ڈالر 14 سینٹ فی بیرل پر بند ہوا، امریکی ڈبلیو ٹی آئی خام تیل کی قیمت 3.11 فی صد اضافے سے 98 ڈالر 71 سینٹ فی بیرل پر بند ہوئی۔غیر ملکی میڈیا کا کہنا ہے مشرق وسطیٰ میں جنگ اور آبنائے ہرمز کی بندش کے باعث خام تیل کی سپلائی متاثر ہو رہی ہے، جس کی وجہ سے خام تیل کی قیمتوں میں اضافہ ہوا ہے۔ایران کے خلاف امریکہ اور اسرائیل کی جنگ اپنے سخت تیسرے ہفتے میں داخل ہو چکی ہے، یہ جنگ پھیل کر عالمی تیل کی قیمتوں کے اس بحران تک جا پہنچی ہے جو پہلے ہی جنم لے رہا تھا۔امریکی صدر ڈونلڈ ٹرمپ نے کہا ہے کہ فوج نے ایران کے جزیرہ خارگ پر فوجی تنصیبات کو بمباری کا نشانہ بنایا ہے، انھوں نے خبردار کیا کہ اگر ایران آبنائے ہرمز کو بند رکھنے کی کوشش جاری رکھتا ہے تو اس علاقے کی اہم تیل تنصیبات بھی اگلا ہدف بن سکتی ہیں۔ دوسری جانب ایران نے ہفتے کے روز دھمکی دی کہ اگر جزیرے پر تیل کے ڈھانچوں کو نشانہ بنایا گیا تو وہ امریکا سے منسلک تیل کی تنصیبات کو راکھ کا ڈھیر بنا دے گا۔سرمایہ کاروں کو تشویش بڑھ رہی ہے کہ اگر آبنائے ہرمز میں اور اس کے ارد گرد جہاز رانی اور توانائی کے بنیادی ڈھانچے پر حملے جاری رہے تو عالمی معیشت کی بحالی میں زیادہ وقت لگے گا۔