مغویوں کی لاشوں کی حوالگی مؤخر کرنے کا اعلان کر دیا
غزہ، 29 اکتوبر (یو این آئی)اسرائیل کی جانب سے جنگ بندی معاہدے کی مسلسل خلاف ورزیوں کے باعث فلسطینی مزاحمتی تنظیم حماس نے اسرائیلی مغویوں کی لاشوں کی حوالگی مؤخر کرنے کا اعلان کردیا۔غیر ملکی ذرائع ابلاغ کے مطابق حماس کے عسکری ونگ القسام بریگیڈز نے خبردار کیا کہ اسرائیلی فوج کے مسلسل حملے یرغمالیوں کی لاشوں کی تلاش اور اس کی حوالگی کے عمل میں رکاوٹ کا سبب بن رہے ہیں۔رپورٹس کے مطابق جنگ بندی معاہدے کے تحت حماس نے گزشتہ روز ایک اسرائیلی یرغمالی کی لاش حوالے کرنے کا اعلان کیا تھا تاہم معاہدے کی شرائط کی خلاف ورزی کے بعد یہ عمل مؤخر کر دیا گیا۔حماس نے اپنے بیان میں اسرائیلی جارحیت کو شرم الشیخ میں طے پانے والے جنگ بندی معاہدے کی کھلی خلاف ورزی قرار دیدیا۔حماس کے مطابق رفح کراسنگ کی مسلسل بندش اس بات کی علامت ہے کہ اسرائیل معاہدے کی شرائط پامال کرنے اور اسے سبوتاژ کرنے پر تُلا ہوا ہے۔حماس نے جنگ بندی کے ضامن ممالک سے مطالبہ کیا کہ وہ فوری اقدام کرتے ہوئے اسرائیل پر دباؤ ڈالیں تاکہ وہ حملے بند کرے اور معاہدے کی تمام شقوں پر عمل درآمد یقینی بنائے۔واضح رہے کہ نیتن یاہو کی سرپرستی میں اسرائیلی فوج نے گزشتہ 24 گھنٹوں کے دوران صابرہ، رفح، خان یونس اور دیار البلاح کو نشانہ بنایا، اس دوران بچوں سمیت 91 فلسطینی شہید ہوگئے۔ دیارالبلاح میں پانچ فلسطنیوں کی شہادتیں ہوئیں۔امریکی صدر ڈونلڈ ٹرمپ کا کہنا ہے کہ اسرائیل نے فوجی پر حملے کا جواب دیا ہے۔ جنگ بندی کو کسی چیز سے خطرہ نہیں ہے۔ حماس خود پرقابو رکھے۔نیتن یاہو نے اسرائیلی فوج پر فائرنگ کا الزام لگا کر حملے کا جواز گھڑتے ہوئے غزہ کے مزید علاقوں کو ہتھیانے کا اعلان کیا ہے۔
