نیپال کے سابق وزرائے اعظم کے خلاف منی لانڈرنگ کی تحقیقات تیز، سابق وزیر کھڑکا گرفتار

کا ٹھمنڈو، 30 مارچ (یواین آئی)یپال کے منی لانڈرنگ انویسٹی گیشن ڈیپارٹمنٹ (ڈی ایم ایل آئی ) کے حکام نے تین سابق وزرائے اعظم اور دو سابق وزراء سے منسلک منی لانڈرنگ کے معاملے کی تحقیقات تیز کر دی ہیں۔ ‘دی کاٹھمنڈو پوسٹ’ کی ایک رپورٹ کے مطابق، یہ کارروائی ابتدائی پوچھ گچھ میں ان کے مالیاتی ریکارڈ اور اثاثوں میں بے ضابطگیاں پائے جانے کے بعد کی گئی ہے۔ڈی ایم ایل آئی نے نیپال پولیس کے سینٹرل انویسٹی گیشن بیورو (سی آئی بی ) کے تعاون سے سابق وزرائے اعظم شیر بہادر دیوبا، کے پی شرما اولی اور پشپ کمل دہل کے ساتھ ساتھ سابق وزراء آرزو رانا دیوبا اور دیپک کھڑکا کے خلاف تفصیلی تحقیقات شروع کر دی ہیں۔ مسٹر کھڑکا، جو پہلے توانائی، آبی وسائل اور آبپاشی کے وزیر کے طور پر خدمات انجام دے چکے ہیں، انہیں عدالت کی اجازت کے بعد سات دن کے ریمانڈ پر بھیج دیا گیا ہے۔ رپورٹ کے مطابق، محکمے نے حال ہی میں تحقیقات کو آگے بڑھانے کے لیے پولیس ہیڈ کوارٹر سے مدد مانگی تھی۔ اس درخواست پر کارروائی کرتے ہوئے پولیس نے اتوار کو نیپالی کانگریس کے رہنما کھڑکا کو بڈھانیل کنٹھ میں واقع ان کی رہائش گاہ سے گرفتار کر لیا۔یہ تحقیقات 9 ستمبر 2025 کو ہونے والی توڑ پھوڑ اور آتشزدگی کے واقعات کے بعد کئی سیاسی شخصیات کی رہائش گاہوں سے جلے ہوئے کرنسی نوٹوں کے ٹکڑے برآمد ہونے کے بعد شروع ہوئی تھیں۔ یہ واقعات ‘جین زی ‘ کی قیادت میں ہونے والے احتجاجی مظاہروں کے ایک دن بعد پیش آئے تھے۔ بعد میں سامنے آنے والے مناظر میں مسٹر دیوبا، مسٹر کھڑکا اور مسٹر دہل کے گھروں پر جلے ہوئے نوٹ دیکھے گئے تھے، جن کی لیبارٹری تجزیہ کے ذریعے اصلی کرنسی کے طور پر تصدیق کی گئی تھی۔ منقولہ اور غیر منقولہ اثاثوں کے بارے میں ابتدائی معلومات جمع کرنے اور جائے وقوعہ کا دورہ کرنے کے بعد، حکام نے اس معاملے کو سی آئی بی حکام کی قیادت میں ایک جامع تحقیقات میں تبدیل کر دیا ہے۔ذرائع اشارہ دیتے ہیں کہ مسٹر کھڑکا اور تحقیقات کے دائرے میں آنے والے دیگر افراد کے خلاف کارروائی بیک وقت آگے بڑھ رہی ہے۔ مسٹر دیوبا 1991 سے عوامی عہدے پر فائز ہیں، لیکن انہوں نے 5 مارچ کو ہونے والے ایوانِ نمائندگان کے انتخابات میں حصہ نہیں لیا تھا۔ انتخابات سے ٹھیک پہلے، 25 فروری کو وہ طبی علاج کے لیے سنگاپور چلے گئے تھے۔ ان کی اہلیہ آرزو رانا دیوبا، جنہوں نے ستمبر کے احتجاجی مظاہروں تک وزیر خارجہ کے طور پر خدمات انجام دی تھیں، 5 جنوری کو نئی دہلی کے لیے روانہ ہوئیں اور تب سے واپس نہیں لوٹی ہیں۔ اس جوڑے کے موجودہ ٹھکانے کے بارے میں ابھی صورتحال واضح نہیں ہے۔