چین کا جاپان سے ترک شدہ کیمیائی ہتھیاروں کی تلفی میں تیزی لانے کا مطالبہ

بیجنگ، 27 نومبر (یو این آئی) چین نے بدھ کے روز ہالینڈ کے شہر دی ہیگ میں آرگنائزیشن فار دی پروہیبیشن آف کیمیکل ویپنز (او پی سی ڈبلیو) کی ریاستوں کی کانفرنس کے دوران جاپان سے مطالبہ کیا کہ وہ چین میں چھوڑے گئے کیمیائی ہتھیاروں (اے سی ڈبلیو ایس) کی تلفی کے عمل کو تیز کرے۔اجلاس میں مندوبین نے کانفرنس اور ایگزیکٹو کونسل کی جانب سے تباہی سے متعلق فیصلوں کے نفاذ کا جائزہ لیا۔ جاپان نے چین میں ترک شدہ کیمیائی ہتھیاروں کی تلفی سے متعلق اپنی پیش رفت رپورٹ پیش کی، جس میں بتایا گیا کہ 2025 میں اس منصوبے پر اخراجات میں سالانہ بنیادوں پر 6.8 فیصد کمی ہوئی ہے۔چینی وفد کے سربراہ وانگ دا شُوئے نے اس رپورٹ پر تنقید کرتے ہوئے کہا کہ یہ رپورٹ صرف تباہی کی پیش رفت اور سرمایہ کاری پر توجہ دیتی ہے جبکہ بنیادی مسائل پر کوئی بات نہیں کرتی۔وانگ نے زور دیتے ہوئے کہا کہ کنونشن کے تحت جاپان کو 2007 تک ترک شدہ کیمیائی ہتھیاروں کی تلفی مکمل کرنی چاہیے تھی، لیکن آخری تاریخ چار مرتبہ مؤخر کی جاچکی ہے۔انہوں نے تاخیر کی وجہ جاپان کی ناکافی توجہ، مناسب سرمایہ کاری کی کمی اور ہتھیاروں کے دفن شدہ مقامات کی معلومات فراہم کرنے میں رضاکارانہ ناکامی کو قرار دیا۔ چین نے خبردار کیا کہ جاپانی ترک شدہ کیمیائی ہتھیار اب بھی چینی شہریوں کی جان و مال اور ماحول کے لیے سنگین خطرات پیدا کر رہے ہیں۔بیجنگ نے ٹوکیو پر زور دیا کہ وہ چین اور عالمی برادری کے خدشات کو سنجیدگی سے لے، اپنی جارحانہ تاریخ پر غور کرے، اپنے وعدوں کی پاسداری کرے اور تباہی کے عمل کے تمام پہلوؤں میں کوششیں بڑھائے۔روس، جنوبی افریقہ اور تیونس سمیت ایک درجن سے زیادہ ملکوں نے چین کی حمایت کرتے ہوئے کہا کہ جاپان کو ہتھیاروں کی تلفی کے عمل میں تیزی لانی چاہیے۔ یوگنڈا کی مستقل نمائندہ میرجم بلاک سو نے غیر جانبدار تحریک کی جانب سے گفتگو کرتے ہوئے کہا کہ “چین کی سرزمین پر جاپان کے چھوڑے گئے کیمیائی ہتھیاروں کی تباہی کی مجموعی پیش رفت توقع سے کم رہی ہے۔”انہوں نے مزید کہا “ہم چھوڑنے والی ریاست سے مطالبہ کرتے ہیں کہ وہ جلد از جلد تلفی مکمل کرنے کے لیے پوری کوشش کرے۔ ہم او پی سی ڈبلیو کی جانب سے اس عمل کی زیادہ مؤثر نگرانی کے بھی منتظر ہیں۔”او پی سی ڈبلیو کے ڈائریکٹر جنرل فرنینڈو اریاس نے پیر کے روز کانفرنس کے افتتاح کے دوران اس مسئلے کی اہمیت پر زور دیتے ہوئے کہا “دنیا بھر میں کیمیائی ہتھیاروں کی مکمل تباہی تب ہی ممکن ہوگی جب چین میں چھوڑے گئے تمام کیمیائی ہتھیار مکمل طور پر تلف ہو جائیں گے۔”