خاندان اور عزت سب سے اہم ،بی جے پی کا پروپیگنڈہ انتخابی چال ہے

چاہے مودی آئیں یا امیت شاہ، جھارکھنڈ کے عوام کو گمراہ نہیں کر پائیں گے: فرقان انصاری

جدید بھارت نیوز سروس
جامتاڑا، 26اکتوبر: سابق ایم پی فرقان انصاری نے سنیچر کو جھارکھنڈ مکتی مورچہ (جے ایم ایم) اور اس کے خاندانی تعلقات پر بی جے پی کی طرف سے چلائی جارہی مہم کی سختی سے مخالفت کی اور واضح کیا کہ ان کے لیے خاندانی تعلقات کسی بھی پارٹی سے بڑھ کر ہیں۔ فرقان انصاری نے کہا کہ عرفان انصاری نے ہمیشہ سیتا سورین کو اپنی بھابھی کی طرح عزت دی ہے۔ جب میں نے گوڈا لوک سبھا الیکشن لڑا تو جے ایم ایم اور کانگریس کے درمیان اتحاد تھا، اس کے باوجود درگا سورین نے الیکشن لڑا، جس کی وجہ سے میں تقریباً 4000 ووٹوں سے الیکشن ہار گیا۔ اس کے باوجود جیسے ہی مجھے درگا سورین کے انتقال کی خبر ملی، میں بوکارو پہنچنے والاپہلا شخص تھا۔ اور گھر والوں کو تسلی دی اس سب کے باوجود میں نے کبھی رشتہ نہیں توڑا۔ شیبو سورین اور ان کے خاندان سے ہمارا پرانا رشتہ تھا اور اب بھی ہے۔ آج بھی میں انہیں وہی عزت دے رہا ہوں۔ میں جب بھی سیتا سورین سے ملا ہوں، میں اسے ہمیشہ بیٹی کہہ کر مخاطب کرتا ہوں۔ جہاں تک عرفان انصاری کا تعلق ہے، ان کی بی جے پی سے مخالفت جاری ہے۔ بی جے پی والے بھی ان (عرفان) کے خلاف بولتے رہتے ہیں اور وہ (عرفان) بی جے پی کے خلاف بھی بولتے رہتے ہیں۔اب جبکہ الیکشن کا وقت آ گیا ہے، بی جے پی کے لوگ جان بوجھ کر یہ ڈرامہ رچ رہے ہیں، لیکن میں یہ واضح کرنا چاہتا ہوں کہ جامتاڑا کے لوگوں نے انہیں (بی جے پی کو ) مکمل طور پر مسترد کر دیا ہے۔ فرقان انصاری نے بی جے پی پر سخت حملہ کرتے ہوئے کہا کہ بی جے پی امیت شاہ کو بھیجے یا وزیر اعظم مودی خود آئیں، جھارکھنڈ کے لوگ ان سے گمراہ نہیں ہوں گے۔ وزیر اعلیٰ ہیمنت سورین کی قیادت میں حکومت کی اسکیموں سے عوام میں خوشی اور اطمینان ہے اور جھارکھنڈ میں عظیم اتحاد کو زبردست حمایت مل رہی ہے۔ اس سے کوئی فرق نہیں پڑتا ہے کہ بی جے پی کتنی ہی طاقت استعمال کرے اور باہر کے لوگوں کو جھارکھنڈ بھیجے، عوامی حمایت عظیم اتحاد کے ساتھ رہے گی۔