بالی ووڈ کی مشہور فلم ’’کھل نائک‘‘ ایک بار پھر سرخیوں میں ہے۔ اس فلم کا سیکوئل ’’کھل نائک 2‘‘ باضابطہ طور پر اعلان کر دیا گیا ہے۔ سنجے دت ایک بار پھر اپنی یادگار کردار “بلو” میں نظر آئیں گے۔
یہ فلم 1993 میں ریلیز ہوئی تھی اور سبھاش گھئی نے اس کی ہدایت کاری کی تھی۔ سنجے دت، مادھوری ڈکشت اور جیکی شراف نے مرکزی کردار ادا کیے تھے۔ فلم نے شاندار کامیابی حاصل کی اور دو فلم فیئر ایوارڈز بھی جیتے۔
اب 32 سال بعد، فلم کے سیکوئل پر کام شروع ہو چکا ہے۔ ہدایت کار سبھاش گھئی نے حال ہی میں اس بات کی تصدیق کی ہے۔ انہوں نے ایک انٹرویو میں انکشاف کیا کہ ’’کھل نائک‘‘ کے حقوق ایک بڑے پروڈکشن ہاؤس کو فروخت کر دیے گئے ہیں۔
سبھاش گھئی نے کہا:
’’میں اب 80 سال کا ہو چکا ہوں، اس لیے اس بار ہدایت کاری نہیں کروں گا۔ مگر میں پروجیکٹ میں تخلیقی مشیر کے طور پر شامل رہوں گا۔‘‘
انہوں نے مزید بتایا کہ کئی اسٹوڈیوز فلم کے رائٹس حاصل کرنا چاہتے تھے۔ آخرکار ایک اسٹوڈیو کو یہ حقوق دے دیے گئے ہیں۔ سنجے دت فلم میں ضرور نظر آئیں گے، یہ بات طے ہے۔
جب ان سے فلم کے مشہور گانے ’’چولی کے پیچھے کیا ہے‘‘ کے بارے میں پوچھا گیا تو انہوں نے بتایا:
’’نئے معاہدے میں مکمل اسکرپٹ، مکالمے، کردار اور موسیقی شامل ہیں۔ اس لیے پرانے گانے بھی نئے انداز میں شامل کیے جا سکتے ہیں۔‘‘
ابھی تک سیکوئل کے ہدایت کار اور مکمل کاسٹ کا اعلان نہیں کیا گیا۔ لیکن اس خبر نے مداحوں میں جوش بھر دیا ہے۔ فلم کے پرستار اب سنجے دت کو ایک بار پھر ’’کھلنائک‘‘ کے روپ میں دیکھنے کے لیے بے تاب ہیں۔
