سماج کے تعاون اور قانون کے خوف سے سڑک حادثات پر قابو پایا جائے گا: گڈکری
نئی دہلی، 12 دسمبر (یو این آئی) مرکزی وزیر برائے روڈ ٹرانسپورٹ و قومی شاہراہ نتن گڈکری نے آج لوک سبھا میں کہا کہ ان کی وزارت کی تمام تر کوششوں کے باوجود سڑک حادثات کم نہیں ہوئے بلکہ اس میں اضافہ ہوا ہے انہوں نے کہا کہ جب تک سماج سے تعاون نہیں ملے گا، انسانی رویے میں تبدیلی نہیں آئے گی قانون کے خوف سے سڑک حادثات پر قابو نہیں پایا جا سکے گا سٹر گڈکری نے کہا کہ ملک میں سڑک حادثات کی تعداد میں مسلسل اضافہ ہو رہا ہے اور ہر سال تقریباً 1 لاکھ 78 ہزار افراد سڑک حادثات میں لقمہ اجل بن جاتے ہیں جن میں سے 60 فیصد اموات 18 سے 34 سال کے نوجوانوں کی ہوتی ہیں۔ انہوں نے کہا کہ سڑک حادثات کے حوالے سے ہندوستان کا ریکارڈ اتنا خراب ہے کہ انہیں عالمی کانفرنسوں میں منہ چھپانا پڑتا ہے۔مسٹر گڈکری نے اراکین پارلیمنٹ پر زور دیا کہ وہ سڑک حادثات کو روکنے کے لیے اپنی سطح پر کوششیں کریں اور محکمہ ٹرانسپورٹ کی مدد سے اسکولوں وغیرہ میں بیداری پروگرام منعقد کریں۔انہوں نے کہا کہ نیتی آیوگ نے اطلاع دی ہے کہ سڑک حادثات کے 30 فیصد متاثرین کی موت ہنگامی طبی علاج نہ ملنے کی وجہ سے ہوتی ہے، اس لیے علاج کے لیے کیش لیس اسکیم کو پائلٹ پروجیکٹ کے طور پر چلایا جا رہا ہے اور اس کے اچھے نتائج برآمد ہوئے ہیں۔ مستقبل میں کیش لیس اسکیم کو پورے ملک میں نافذ کیا جائے گا۔مرکزی وزیر نے ہندوستان میں ڈرائیونگ لائسنس جاری کرنے کے نظام میں اصلاح کی ضرورت پر زور دیتے ہوئے کہا کہ دنیا میں آسانی سے ڈرائیونگ لائسنس حاصل کرنے کے لئے جس ملک کا نام سرفہرست ہے، وہ ہندوستان ہے۔ ہم اسے مزید بہتر کر رہے ہیں۔لوک سبھا اسپیکر اوم برلا نے کہا کہ سڑک حادثات سے پورا ایوان پریشان ہے۔ اسے کم کرنے کے لیے سنجیدہ کوششیں کی جانی چاہئیں۔ انہوں نے کہا کہ اس کے لیے معاشرے خصوصاً نوجوانوں کو بیدار کرنے کی ضرورت ہے اور عوامی نمائندوں کو بھی اس کے لئے پہل کرنی چاہیے۔
