ریاست میں پلوں کی کمی کو دور کرنے کیلئے وزیر اعلیٰ ہیمنت سورین کا نیا اقدام
جدید بھارت نیوز سروس
رانچی، 11 جنوری:۔ جھارکھنڈ کے دیہی علاقوں میں پلوں کی تعمیر کے لیے ایک اہم اقدام کیا گیا ہے، جس کے تحت مقامی منتخب نمائندوں سے پلوں کی تعمیر کے لیے سفارشات طلب کی جائیں گی۔ یہ فیصلہ ریاست کے دیہی علاقوں میں بنیادی ڈھانچے کی ترقی کے لیے اُٹھایا گیا ہے تاکہ عوام کو بہتر سفری سہولتیں فراہم کی جا سکیں۔ اس سلسلے میں دیہی کاموں کے محکمے کی جانب سے ایک حکم نامہ جاری کیا گیا ہے۔
’وزیر اعلیٰ گرام سیتو یوجنا‘ کے تحت پلوں کی تعمیر
وزیر اعلیٰ ہیمنت سورین کی قیادت میں، ریاستی حکومت نے’ وزیر اعلیٰ گرام سیتویوجنا ‘ کے تحت ان پلوں کی تعمیر کرنے کا فیصلہ کیا ہے جہاں پل کی کمی کی وجہ سے لوگوں کو شدید مشکلات کا سامنا ہے اور روزمرہ کی زندگی میں مشکلات پیدا ہو رہی ہیں۔ وزیر اعلیٰ نے اس بات پر زور دیا کہ ریاست کے غریب عوام کو پل یا سڑک کی کمی کی وجہ سے کوئی پریشانی نہ ہو اور ان کی سفری سہولتوں کو بہتر بنایا جائے۔
محکمہ دیہی امور نے فہرست تیار کرنے کی ہدائت دی
محکمہ دیہی امور نے اپنے انجینئروں کو ہدایت دی ہے کہ وہ ایسے علاقوں کی فہرست تیار کریں جہاں ندی یا نالے کے دونوں طرف سڑکیں تو بن چکی ہیں لیکن پل کی کمی ہے۔ ان انجینئروں کو یہ بھی کہا گیا ہے کہ وہ مقامی منتخب نمائندوں سے سفارشات حاصل کریں تاکہ پلوں کی تعمیر کے لیے مناسب منصوبہ بندی کی جا سکے۔ اس عمل کے تحت، منصوبے کی تفصیلات (DPR) تیار کی جائیں گی تاکہ انتظامی منظوری حاصل کی جا سکے اور ان پلوں کی تعمیر کا عمل وقت پر شروع کیا جا سکے۔
ریاست کے بنیادی ڈھانچے کی بہتری کی امید
وزیر اعلیٰ ہیمنت سورین نے کہا کہ یہ منصوبہ دیہی علاقوں میں ترقی کی ایک اہم کڑی ثابت ہوگا اور اس سے نہ صرف لوگوں کو آسانی سے سفر کرنے کی سہولت ملے گی بلکہ علاقے کی معاشی ترقی میں بھی اضافہ ہوگا۔ ان اقدامات سے ریاست میں بنیادی ڈھانچے کی بہتری کی امید کی جا رہی ہے جس سے دیہاتوں میں رہائش پذیر افراد کی زندگی میں نمایاں تبدیلی آ سکے گی۔ یاد رہے کہ جھارکھنڈ کے کئی دیہی علاقوں میں پلوں کی کمی کی وجہ سے لوگوں کو ندیوں یا نالوں کے پار جانے میں مشکلات کا سامنا ہے، جس سے ان کے روزمرہ کے کام متاثر ہوتے ہیں۔ حکومت کی یہ نئی پالیسی ان مسائل کے حل کے لیے ایک بڑا قدم ثابت ہو سکتی ہے۔
