زخمیوں کے علاج کیلئے 1.5 لاکھ تک کا خرچ حکومت برداشت کرے گی
ہٹ اینڈ رن کیس میں مرنے والوں کے لواحقین کو 2 لاکھ روپے کا معاوضہ ملے گا: نتن گڈکری کا اعلان
نئی دہلی، 8 جنوری:۔ (ایجنسی) مرکزی وزیر نتن گڈکری نے اعلان کیا ہے کہ حکومت مارچ تک ایک ترمیم شدہ منصوبہ متعارف کرائے گی، جس کے تحت ملک بھر میں روڈ حادثات کے متاثرین کو نقدی کے بغیر علاج فراہم کیا جائے گا۔ اس اسکیم کے تحت، ہر شخص کو فی حادثہ زیادہ سے زیادہ 1.5 لاکھ روپے تک کا علاج فراہم کیا جائے گا۔ یہ اسکیم تمام روڈ حادثات پر لاگو ہوگی، چاہے وہ کسی بھی قسم کی سڑک پر موٹر گاڑیوں کے استعمال سے پیش آئیں۔ نیشنل ہیلتھ اتھارٹی (این ایچ اے) اس منصوبے کو پولیس، اسپتالوں اور ریاستی صحت ایجنسی کے تعاون سے نافذ کرے گی۔ یہ منصوبہ ایک آئی ٹی پلیٹ فارم کے ذریعے چلایا جائے گا، جو وزارت روڈ ٹرانسپورٹ اینڈ ہائی ویز کے ای-ڈیٹیلڈ ایکسیڈنٹ رپورٹ (ای ڈی اے آر) ایپلی کیشن اور این ایچ اے کے ٹرانزیکشن مینجمنٹ سسٹم کے ساتھ مربوط ہوگا۔ہٹ اینڈ رن کیس میں مرنے والوں کیلئے 2 لاکھ
مرکزی وزیر نے ہٹ اینڈ رن کیسوں میں مرنے والوں کے لواحقین کے لیے 2 لاکھ روپے کی ایکس گریشیا رقم کا بھی اعلان کیا۔ مرکزی روڈ ٹرانسپورٹ اینڈ ہائی ویز منسٹر نے کہا کہ ’ ہم نے کیش لیس علاج کے لیے ایک نئی اسکیم شروع کی ہے۔ اس میں اگر پولیس کو 24 گھنٹے کے اندر حادثے کی اطلاع ملتی ہے تو مریض کے سات دن کے علاج کے اخراجات یا زیادہ سے زیادہ 1.5 لاکھ روپے ہوں گے‘۔ علاج کے لیے معاوضہ ادا کیا جائے گا۔ ہم ہٹ اینڈ رن کیس میں مرنے والوں کے لیے 2 لاکھ روپے بھی فراہم کریں گے۔ مرکزی وزیر نے یہ بھی بتایا کہ مارچ 2024 میں وزارت نے چندی گڑھ میں ایک پائلٹ پروگرام کے ذریعے اس اسکیم کا آغاز کیا تھا، جس کا مقصد حادثات کے متاثرین کو بروقت طبی امداد فراہم کرنا تھا۔ اس منصوبے کو بعد میں چھ ریاستوں تک توسیع دی گئی۔
ڈرائیوروں کے کام کے اوقات اور دیگر اصلاحات
نتن گڈکری نے بتایا کہ حکومت کمرشل ڈرائیوروں کے کام کے اوقات مقرر کرنے کے لیے لیبر قوانین کا جائزہ لے رہی ہے، کیونکہ تھکاوٹ کی وجہ سے حادثات میں اضافہ ہو رہا ہے۔ انہوں نے کہا کہ ملک میں 22 لاکھ ڈرائیوروں کی کمی کا سامنا ہے۔
