میڈل لاؤ، نوکری پاؤ: باصلاحیت کھلاڑیوں کو ملی سرکاری ملازمت، وزیر اعلیٰ نتیش کمار نے دیا تقرری نامہ
بہار کے وزیر اعلیٰ نتیش کمار نے ہفتہ کے روز ’میڈل لاؤ، نوکری پاؤ‘ منصوبہ کے تحت منعقد تقریب میں باصلاحیت کھلاڑیوں کو تقرری نامہ پیش کیا۔ انھوں نے چین کے ہانگزوؤ میں منعقد 19ویں ایشین گیمز اور چوتھے ایشین پارا گیمز 2023 کے ہائی جمپ مقابلہ میں گولڈ میڈل جیتنے والے شیلیش کمار، کامن ویلتھ گیمز میں لان بال کھیل میں میڈل جیتنے والے چندن کمار سنگھ، چوتھے ایشین پارا گیمز 2023 کے تیراکی میں بہترین کارکردگی پیش کرنے والے محمد شمس عالم شیخ، سائیکلنگ ٹریک میں جلوہ دکھانے والے جلال الدین انصاری، تلوار بازی میں آکاش کمار، کبڈی میں ساگر کمار، ایشین گیمز کے رگبی کھیل میں بہترین کھیل دکھانے والی شویتا شاہی سمیت کبڈی، رگبی، مارشل آرٹ، اتھلیٹکس، فٹبال اور ڈریگن بال کھیل میں بہترین کھیل پیش کرنے والے 71 کھلاڑیوں کو تقرری نامہ دیا۔
اس موقع پر موجود لوگوں سے خطاب کرتے ہوئے وزیر اعلیٰ نے کہا کہ ریلوے میں کھلاڑیوں کو ملازمت دینے کی طرز پر 2010 سے بہار میں بھی بہترین کارکردگی پیش کرنے والے کھلاڑیوں کو سرکاری ملازمت دینا شروع کیا گیا، جس کے تحت 2010 میں 33، 2011 میں 125، 2015 میں 82 اور 2020 میں 31 یعنی مجموعی طور پر 271 کھلاڑیوں کو ملازمتیں دی گئی تھیں۔ اب ریاست میں کھیل کے گئیں نوجوانوں کی دلچسپی بڑھانے کے لیے ریاستی حکومت کے ذریعہ ’میڈل لاؤ، نوکری پاؤ‘ طرز پر بہار کے باصلاحیت کھلاڑیوں کی سیدھی بھرتی رول 2023 بنائی گئی ہے۔ اس کے تحت قومی اور بین الاقوامی کھیل مقابلوں میں میڈل حاصل کرنے والے کھلاڑیوں کو سیدھی ملازمت دی جا رہی ہے۔
اس نئے اصول کے مطابق کھلاڑیوں کو اچھی کارکردگی پیش کرنے پر ایس ڈی او اور ڈی ایس پی تک بننے کا موقع ملے گا۔ اس اصول کے تحت آج 71 کھلاڑیوں کو ملازمت دی گئی ہے جن میں 2 کو افسر کی ملازمت دی گئی ہے جس میں چائلڈ ڈیولپمنٹ پروجیکٹ افسر اور بلاک پنچایتی راج افسر شامل ہیں۔ 69 کو ایڈیشنل پولیس انسپکٹر، محکمہ سماجی فلاح میں سپرنٹنڈنٹ اور ڈاٹا انٹری آپریٹر و ٹاپسٹ کی ملازمتیں دی گئی ہیں۔
وزیر اعلیٰ نتیش کمار نے کہا کہ بہار میں کھیل کو فروغ دیا جا رہا ہے۔ ریاست میں اس کے لیے کئی قدم اٹھائے گئے ہیں۔ ابھی تک کھیل سے متعلق سبھی کام آرٹس، کلچر اور یوتھ محکمہ کے ماتحت کیے جاتے ہیں۔ کھیلوں کو فروغ دینے کے لیے ریاست میں الگ سے محکمہ کھیل کی تشکیل ہوگی۔ اب اسی محکمہ کے ذریعہ کھیل کود سے متعلق کام کیے جائیں گے۔ ساتھ ہی اچھے کھلاڑیوں کو اسکالرشپ دی جائے گی تاکہ نوجوان کھلاڑی اپنی پوری توجہ کھیل پر دے سکیں۔
