جدید بھارت نیوز سروس
رانچی،10؍مارچ: جھارکھنڈ میں موسم کا مزاج ایک بار پھر بدل گیا ہے۔ رانچی میں صبح سے ہی بادل چھائے ہوئے ہیں۔ محکمہ موسمیات، رانچی نے ریاست کے کئی اضلاع میں گرج چمک (بجلی گرنے) اور تیز ہواؤں کے حوالے سے ‘یلو الرٹ‘جاری کیا ہے۔ یہ سلسلہ 10 مارچ سے شروع ہو کر 13 مارچ تک جاری رہ سکتا ہے۔ اس دوران ریاست کے کئی حصوں میں گرج چمک کے ساتھ بارش اور 40 سے 50 کلومیٹر فی گھنٹہ کی رفتار سے تیز ہوائیں چل سکتی ہیں۔ منگل کی شام مغربی سنگھ بھوم کے کئی علاقوں میں تیز ہوا اور آسمانی بجلی کے ساتھ بارش کی وارننگ جاری کی گئی ہے۔
11 اور 12 مارچ کے لیے الرٹ
محکمہ موسمیات کے مطابق، اس دوران خاص طور پر ریاست کے وسطی اور شمالی اضلاع میں مختلف مقامات پر بجلی گرنے کے واقعات ہو سکتے ہیں۔ اسے مدنظر رکھتے ہوئے لوگوں کو محتاط رہنے کا مشورہ دیا گیا ہے۔ محکمہ موسمیات کے مطابق 11 اور 12 مارچ تک ریاست کے کئی حصوں میں موسم کی صورتحال ایسی ہی رہے گی۔ ان میں رانچی، ہزاری باغ، گریڈیہہ، بوکارو، دھنباد، رام گڑھ، کوڈرما، سرائے کیلا-کھرساواں، مغربی سنگھ بھوم اور مشرقی سنگھ بھوم سمیت کئی اضلاع شامل ہیں، جہاں گرج چمک کے ساتھ تیز ہوائیں چلنے اور بجلی گرنے کا خدشہ ظاہر کیا گیا ہے۔
13 مارچ کو ان اضلاع میں بجلی گرنے کا امکان
تاہم، 13 مارچ تک اس کا اثر بتدریج کم ہو جائے گا اور موسمی سرگرمیاں ریاست کے سنتھال پرگنہ کے علاقے تک محدود رہ جائیں گی۔ اس دوران دیوگھر، دمکا، گڈا، جامتاڑا، صاحب گنج اور پاکوڑ کے اضلاع میں گرج چمک کے ساتھ ہلکی بارش اور بجلی گرنے کا امکان رہے گا۔
احتیاط برتنے کی اپیل
محکمہ موسمیات رانچی نے کسانوں اور عام لوگوں کو مشورہ دیا ہے کہ خراب موسم کے دوران کھلے مقامات، کھیتوں اور درختوں کے نیچے کھڑے ہونے سے گریز کریں۔ ساتھ ہی بجلی کڑکنے کے دوران محفوظ مقامات پر رہنے کی ہدایت دی گئی ہے۔ تیز ہوا اور بجلی گرنے کی وجہ سے بعض مقامات پر درختوں کی شاخیں ٹوٹنے اور عارضی ڈھانچوں کو نقصان پہنچنے کا بھی خدشہ ہے۔ ایسے میں لوگوں سے اپیل کی گئی ہے کہ وہ موسم سے متعلق وارننگز پر نظر رکھیں اور احتیاط برتیں۔
زیادہ سے زیادہ اور کم سے کم درجہ حرارت کی صورتحال
دارالحکومت رانچی میں گزشتہ 24 گھنٹوں کے دوران زیادہ سے زیادہ درجہ حرارت 9.32 ڈگری سیلسیس درج کیا گیا، جو معمول سے 5.2ڈگری زیادہ ہے۔ وہیں کم سے کم درجہ حرارت 8.19 ڈگری سیلسیس رہا، جو معمول سے 4 ڈگری زیادہ ریکارڈ کیا گیا۔ جمشید پور میں زیادہ سے زیادہ درجہ حرارت 6.34 ڈگری اور کم سے کم 8.21 ڈگری سیلسیس درج کیا گیا۔ ڈالٹن گنج میں بھی گرمی کا اثر دیکھا گیا، جہاں زیادہ سے زیادہ درجہ حرارت 4.35 ڈگری اور کم سے کم 7.21 ڈگری سیلسیس رہا۔دوسری طرف، بوکارو میں زیادہ سے زیادہ درجہ حرارت 1.27 ڈگری اور کم سے کم 1.21 ڈگری سیلسیس درج کیا گیا، جبکہ چائباسہ میں زیادہ سے زیادہ درجہ حرارت 4.32 ڈگری اور کم سے کم 6.20 ڈگری سیلسیس ریکارڈ کیا گیا۔ محکمہ موسمیات کے اعداد و شمار کے مطابق ریاست میں سب سے زیادہ درجہ حرارت سرائے کیلا میں 1.36 ڈگری سیلسیس درج کیا گیا۔ وہیں سب سے کم درجہ حرارت لاتیہار میں 1.17 ڈگری سیلسیس ریکارڈ کیا گیا۔
جھارکھنڈ میں موسم کا مزاج بدلا
