ڈورنڈا میں گود لی بیٹی نے عاشق کے ساتھ مل کر ماں کو قتل کیا

پولیس نے قبر کھود کر نکالی لاش ،پوسٹ مارٹم کیلئے بھیجی ؛ تین حراست میں

جدید بھارت نیوز سروس
رانچی، 28 اپریل: دارالحکومت کے ڈورنڈا تھانہ علاقہ کے منی ٹولہ میں ایک دل دہلا دینے والا معاملہ سامنے آیا ہے، جہاں ایک بیٹی نے اپنے عاشق کے ساتھ مل کر مبینہ طور پر اپنی ہی ماں کا قتل کر دیا۔ پولیس نے کارروائی کرتے ہوئے ڈورنڈا قبرستان میں تدفین کے بعد لاش کو مجسٹریٹ کی موجودگی میں باہر نکالا اور پوسٹ مارٹم کے لیے ریمز بھیج دیا۔ مقتولہ کی عمر تقریباً 50 سال تھی اور بتایا جا رہا ہے کہ اس نے برسوں پہلے اس لڑکی کو گود لے کر اپنی اولاد کی طرح پالا تھا۔ واقعے کے مطابق، خاتون کی موت کے بعد اسے قدرتی موت قرار دے کر تدفین کر دی گئی تھی۔ تاہم، غسل اور جنازے کے وقت کچھ خواتین نے جسم پر چوٹ کے نشانات دیکھے تھے جس سے شک پیدا ہوا۔ بعد ازاں اہل خانہ کو جب لڑکی کی باتوں پر شبہ ہوا تو پولیس میں شکایت درج کرائی گئی۔ تھانہ انچارج دپیکا پرساد نے بتایا کہ پولیس نے فوری کارروائی کرتے ہوئے بیٹی اور اس کے دو ساتھیوں کو حراست میں لے لیا ہے، جنہوں نے ابتدائی پوچھ گچھ میں جرم کا اعتراف کر لیا ہے۔ پولیس کے مطابق قتل کی وجہ جائیداد کا تنازع یا باہمی رنجش ہو سکتی ہے، جس کی مزید تفتیش جاری ہے۔