جھارکھنڈ کے 765 اسکول پلس ٹو لیول میں ہوںگے اپ گریڈ

وزیراعلیٰ ہیمنت سورین نے اسکولی تعلیم و خواندگی محکمہ کی تجویز کو دی منظوری

نئے تعلیمی سیشن سے شروع ہوں گی 11 ویں اور 12 ویں کی کلاسیں

جدید بھارت نیوز سروس
رانچی، 24 جون:۔ ریاست میں ثانوی اور اعلیٰ ثانوی تعلیم کو مستحکم کرنے کے مقصد سے جھارکھنڈ حکومت نے 765 اسکولوں کو پلس ٹو سطح تک اپ گریڈ کرنے کا فیصلہ کیا ہے۔ وزیراعلیٰ ہیمنت سورین نے اسکولی تعلیم اور خواندگی محکمہ کی اس تجویز کو منظوری دے دی ہے۔ اس فیصلے کے بعد منتخب اسکولوں میں آئندہ تعلیمی سیشن سے 11 ویں اور 12 ویں جماعتوں کی پڑھائی شروع کرنے کی تیاریاں کی جائیں گی۔ حکومت کے اس اقدام کا سب سے بڑا فائدہ ان طلبہ کو ہوگا جنہیں اعلیٰ ثانوی تعلیم کے لیے طویل فاصلہ طے کرنا پڑتا ہے۔ اپ گریڈ کیے جانے والے اسکولوں میں 449 ہائی اسکول اور 316 مڈل اسکول شامل ہیں۔ محکمہ نے تمام اضلاع سے ایسے اسکولوں کی فہرست طلب کی تھی جنہیں پلس ٹو کی سطح تک تیار کیا جا سکتا ہے، جہاں اضلاع کی جانب سے موصول ہونے والی کل 3334 اسکولوں کی تجاویز میں سے طے شدہ معیارات کی بنیاد پر 765 اسکولوں کا حتمی انتخاب کیا گیا ہے۔اسکولوں کے انتخاب میں ان پنچایتوں کو ترجیح دی گئی ہے جہاں اب تک پلس ٹو اسکول دستیاب نہیں ہیں۔ اس کے علاوہ ایسے مڈل اور ہائی اسکولوں کا انتخاب کیا گیا ہے جن کے پاس کم از کم 1 ایکڑ زمین دستیاب ہے۔ حکومت نے پہاڑی، سطح مرتفع، گھنے جنگلات اور ندیوں سے گھیرے دور دراز کے علاقوں کو بھی ترجیح دی ہے جہاں طلبہ کو پڑھائی کے لیے مشکل جغرافیائی حالات کا سامنا کرنا پڑتا ہے۔ اعداد و شمار کے مطابق پنچایت علاقوں میں 361 ہائی اسکولوں اور 295 مڈل اسکولوں کو پلس ٹو کی سطح تک ترقی دی جائے گی۔ دوسری جانب شہری بلدیاتی علاقوں میں 53 ہائی اسکول اور 41 مڈل اسکول منتخب کیے گئے ہیں، جبکہ دشوار گزار جغرافیائی خطوں کے 15 ہائی اسکول بھی اس اہم اسکیم کا حصہ بنائے گئے ہیں۔ریاستی حکومت کے مطابق جھارکھنڈ میں فی لاکھ آبادی پر 106 پرائمری اور مڈل اسکول دستیاب ہیں، جبکہ اتنی ہی آبادی پر صرف 8 ہائی اسکول اور پلس ٹو اسکول ہیں۔ پرائمری سطح کے مقابلے ثانوی سطح پر طلبہ کے اسکول چھوڑنے کی شرح بھی کافی زیادہ ہے۔ نئی تعلیمی پالیسی کے تحت ہر ہائی اسکول میں نویں سے بارہویں جماعت تک کی پڑھائی کو یقینی بنانے کا ہدف رکھا گیا ہے، جس کو مدنظر رکھتے ہوئے یہ اہم فیصلہ لیا گیا ہے۔ اس تعلیمی اصلاحات کے تحت اپ گریڈ ہونے والے ہر اسکول میں پرنسپل سمیت 12 اسامیوں کی تخلیق کی جائے گی، جبکہ طلبہ کی تعداد اور مضامین کی ضرورت کے مطابق مختلف مضامین کے 13 اضافی اساتذہ کے تقرر کی گنجائش بھی رکھی گئی ہے تاکہ پڑھائی کا نظام متاثر نہ ہو۔