تعمیراتی کام جلد مکمل کرنے کی ہدایت
جدید بھارت نیوز سروس
پٹنہ: بہار کے وزیر اعلیٰ نتیش کمار نے ہفتہ کو بہار میوزیم اور پٹنہ میوزیم کو جوڑنے والی زیر تعمیر سرنگ (ٹنل) کا معائنہ کیا اور حکام کو اس کی تعمیر تیزی سے مکمل کرنے کی ہدایت دی۔بر وقت اور معیاری تعمیر کی ہدایت معائنے کے دوران حکام نے وزیر اعلیٰ نتیش کمار کو سرنگ کے تعمیراتی کام کی پیشرفت اور موجودہ صورتحال کے بارے میں تفصیلی جانکاری دی۔ نہرو پتھ کے قریب ہڑتالی موڑ پر واقع زیر تعمیر میوزیم سب وے ٹنل کا معائنہ کرتے ہوئے وزیر اعلیٰ نے کہا کہ اس بات کا خاص خیال رکھا جائے کہ تعمیراتی کام بہتر طریقے سے اور جلد مکمل ہو۔ انہوں نے کہا کہ اس سرنگ کی تعمیر سے لوگ بہار میوزیم اور پٹنہ میوزیم کے نوادرات کا ایک جگہ سے دوسری جگہ جا کر آسانی سے مشاہدہ کر سکیں گے۔میوزیمز کے درمیان آسان آمد و رفت ممکن ہوگی سیاحوں کی بڑھتی ہوئی تعداد کے پیش نظر انہوں نے پارکنگ اور دیگر ضروری سہولیات کے مناسب انتظامات کو یقینی بنانے کی ہدایت دی۔ انہوں نے مزید کہا کہ سرنگ کی تعمیر اس طرح کی جائے کہ نہرو پتھ پر ٹریفک کی روانی میں کوئی دشواری پیش نہ آئے۔سرنگ کے معائنے سے قبل وزیر اعلیٰ نے بہار میوزیم کے سامنے دوبارہ تیار کیے جانے والے 60 رہائشی مکانات اور آفیسرز ہاسٹل کیمپس کے تعمیراتی کام کا بھی جائزہ لیا۔ حکام نے بتایا کہ یہاں ایک 11 منزلہ عمارت تعمیر کی جانی ہے، جس میں سولر پارکنگ شیڈ، اوپن پارکنگ، کلب ہاؤس اور پارکنگ کے دیگر وسیع انتظامات ہوں گے۔ وزیر اعلیٰ نے ہدایت دی کہ اس کام کو تیزی سے آگے بڑھایا جائے کیونکہ پرانے ڈھانچے کو گرا کر تمام جدید سہولیات سے لیس کثیر المنزلہ عمارت بنانا ان کا دیرینہ خواب تھا۔بعد ازاں، وزیر اعلیٰ نتیش کمار نے بہار میوزیم کا دورہ کیا اور وہاں موجود نوادرات کا مشاہدہ کیا۔ انہوں نے میوزیم کی پہلی منزل پر نالندہ مہا بہار، سانچی اسٹوپا سے متعلق تصویری نمائش اور بودھ گیا کے مہابودھی مندر سے متعلق تھری ڈی (3D) فلم بھی دیکھی۔ بہار میوزیم کے ڈائریکٹر جنرل انجنی کمار سنگھ نے میوزیم میں لگائے گئے نئے نوادرات، سیاحوں کی تعداد اور دستیاب سہولیات کے بارے میں وزیر اعلیٰ کو تفصیل سے آگاہ کیا۔اس موقع پر وزیر آبی وسائل و پارلیمانی امور وجے کمار چودھری، وزیر اعلیٰ کے پرنسپل سکریٹری دیپک کمار، سکریٹری کمار روی، ضلع مجسٹریٹ ڈاکٹر تیاگ راجن ایس ایم، ایس ایس پی کارتیکیہ کے شرما اور دیگر اعلیٰ حکام موجود تھے۔
