امارت شرعیہ ایجوکیشنل اینڈ ویلفیئر ٹرسٹ کے چیئرمین ذاکر بلیغ ایڈوکیٹ ، جنرل سکریٹری قاضی شریعت مولانا محمد انظار عالم قاسمی اور خزانچی قسیم رضا مقرر
پٹنہ، 3 اگست2025(راست)امیر شریعت بہار ،اڈیشہ وجھارکھنڈ حضرت مولانا احمد ولی فیصل رحمانی صاحب نے آج مورخہ 3 اگست 2025 کو مفتی محمد سعید الرحمان صاحب قاسمی کو امارت شرعیہ بہار، اڈیشہ و جھارکھنڈ کا مستقل ناظم مقرر کردیا ہے۔اسی طرح حضرت امیر شریعت جو کہ امارت شرعیہ ایجوکیشنل اینڈ ویلفیئر ٹرسٹ کے سرپرست بھی ہیں انہوں نے جناب ذاکر بلیغ صاحب ایڈوکیٹ بتیا کو امارت شرعیہ ایجوکیشنل اینڈ ویلفیئر ٹرسٹ کا چیئرمین ، جناب قاضی محمد انظار عالم قاسمی صاحب چیف قاضی شریعت امارت شرعیہ کو جنرل سکریٹری اور جناب قسیم رضا صاحب چارٹر اکاؤنٹنٹ علی نگر انیس آباد پٹنہ کو امارت شرعیہ ایجوکیشنل اینڈ ویلفیئر ٹرسٹ کا ٹریزر یعنی خزانچی مقرر کردیا ہے ۔مفتی محمد سعید الرحمان صاحب قاسمی طویل عرصے سے امارت شرعیہ میں خدمت انجام دے رہے ہیں۔ 3 مارچ 2025 کو انہیں قائم مقام ناظم بھی بنایا گیا تھا، اور اس مختصر مدت میں انہوں نے قائم مقام ناظم کی حیثیت سے اپنی غیر معمولی انتظامی صلاحیت، مضبوط قیادت اور جرأت مندانہ فیصلوں سے حضرت امیر شریعت مولانا احمد ولی فیصل رحمانی صاحب کی قیادت میں امارت کے کاموں کو بحسن و خوبی انجام دیا۔ اسی طرح جناب ذاکر بلیغ صاحب، جناب قاضی محمد انظار عالم قاسمی صاحب اور جناب قسیم رضا صاحب اپنے اپنے شعبوں میں مہارت، دیانت اور خدمت کا طویل تجربہ رکھتے ہیں ، برسوں سے امارت شرعیہ سے جڑ کر کام کرتے رہے ہیں ۔ مجھے یقین ہے کہ یہ تمام حضرات امارت شرعیہ اور ایجوکیشن اینڈ ویلفیئر ٹرسٹ کی پوری ٹیم کے ساتھ مل کر نہ صرف امارت شرعیہ بلکہ ایجوکیشن اینڈ ویلفیئر ٹرسٹ کے مقاصد کو بھی کامیابی سے آگے بڑھائیں گے ۔”مفتی محمد سعید الرحمان صاحب قاسمی نے اس موقع پر کہا کہ:”یہ میرے لیے اللہ تعالیٰ کی بڑی نعمت اور امیر شریعت حضرت مولانا احمد ولی فیصل رحمانی صاحب کا مجھ پر بے پناہ اعتماد ہے۔ میں اللہ کی ذات پر توکل کرتے ہوئے یقین دلاتا ہوں کہ امارت شرعیہ کے نصب العین کو امیر شریعت کی مضبوط قیادت میں امارت شرعیہ کو مزید مضبوط اور مؤثر بنانے کے لیے اپنی پوری توانائیاں صرف کروں گا۔”امارت شرعیہ کے دیگر عہدیداران ، کارکنان، علما، ائمہ، اور عام مسلمانوں نے امارت شرعیہ کی نظامت کیلئے مفتی محمد سعید الرحمان صاحب قاسمی کی تقرری پر خوشی اور اطمینان کا اظہار کرتے ہوئے مبارکباد پیش کی اور حضرت امیر شریعت صاحب کے اس قدم کو قابل تحسین قرار دیا، اسی طرح ایجوکیشن اینڈ ویلفیئر ٹرسٹ کے مقررکردہ عہدیداران کو بھی مبارکباد پیش کرتے ہوئے خوشی و اطمینان کا اظہار کیا ۔
