متاثرین کے درمیان تقسیم ریلیف مفتی محمد سعید الرحمن قاسمی
پھلواری شر یف29 دسمبر (راست) امارت شرعیہ بہار اڈیشہ وجھارکھنڈ کے ناظم مولانا مفتی محمد سعید الرحمن قاسمی نے ایک اخباری بیان میں کہا کہ چند دنوں قبل ویشالی کے لعل گنج بلاک میں واقع موضع کانٹی نہر پر کے باشندوں کے مکانات کو قرب وجوار کی بستیوں کے کچھ شر پسندوں او رفرقہ پرستوں نے نذر آتش کردیا اور منصوبہ بند طریقہ اور سازش کے تحت گھر کے تمام اثاثوں کو راکھ کے ڈھیر میں بد ل دیا ، ظالموں اور سفاکوں پر مکینوں کے چیخ وپکار اور آہ وبکا کا بھی کوئی اثر نہیںہوا ،کسی کے کانوں پر جوں تک نہیں رینگی سب مذہبی جنون میں ظلم وبے رحمی اور سفاکی ودرندگی کے ساتھ ان غریبوں کے اشیاء خوردنی تک کو خاکستر کر دیا ،آتشزدگی کی خبر جیسے ہی امارت شرعیہ پھلواری شریف پہونچی فوراََامیر شریعت بہار اڈیشہ وجھار کھنڈ مفکر ملت حضرت مولانا سید احمد ولی فیصل رحمانی مدظلہ کے مشورہ سے جائے وقوع پر حالات وواقعات کاجائزہ لینے کے لئے امار ت شرعیہ کا وفد پہونچا ، اس کی رپورٹ کی روشنی میں امارت شرعیہ پھلواری شریف کی طرف سے ایک امدادی ٹیم ۲۸/دسمبر ۲۰۲۵ء کو موقع واردات پر بھیجی جس میں مولانا رضوان احمد ندوی صاحب معاون ناظم امارت شرعیہ ،مولانا قمر انیس قاسمی صاح معاون ناظم امارت شرعیہ ،جناب عبد الوہاب انصاری صاحب ریٹائرد اے ڈی ایم شعبہ اصلاحات اراضی امارت شرعیہ ،جناب عبد الرحمن صاحب ریٹائرڈ آئی جی ،جناب محمد ہارون رشید صاحب ایڈوکیٹ امارت شرعیہ ،مولانا عبد القدوس مظاہری صاحب شعبہ دعوت وتبلیغ امارت شرعیہ شامل تھے، امارت شرعیہ کی طرف سے مصیبت زدہ فیملی کے درمیان تمام ذمہ داروں کی موجودگی میں چیک ،کمبل اور ساڑی تقسیم کی ،جس سے متاثرین نے راحت کی سانس لی ،امارت شرعیہ کے اس عمل کو لوگوں نے سراہا اور حضرت امیر شریعت کا شکریہ ادا کیا۔ جناب مصباح الدین اکرم نقیب امار ت شرعیہ چک صالح، لعل گنج ،جناب امتیاز احمد کانٹی لعل گنج کی نگرانی میں متاثرہ افراد نے باہمی گفت وشنید میں بتایا کہ اب تک حکومت کی طرف سے کسی طرح کی کوئی مدد نہیں ملی ہے اس کیلئے وفد کے ذمہ داروں نے لعل گنج تھانہ کے انسپکٹر وداروغہ سے ملاقات کی پھر بلاک کے CEOسے بات چیت کرکے خانہ برباد لوگ کو حکومت کی جانب سے امداد دئیے جانے پر اور توجہ دلائی اس کیلئے CEOنے وعدہ بھی کیا ،ناظم امارت شرعیہ نے مزید کہا کہ اس طرح غریبوں پر بے رحمانہ حملہ سماجی ڈھانچہ پر ایک سیاہ دھبہ ہے اس لئے حکومت کی ذمہ داری ہے کہ ایسے شرپسندوں کو گرفتار کر کے سخت سے سخت سزا دلوائے ساتھ ہی متاثرین کے مکانات کی تعمیر نو کر وائے تاکہ اجڑے ہوئے لوگ امن وسکون کے ساتھ زندگی بسر کر سکیں ۔
