ریاست بھر کے زرعی بازاروں کی مرحلہ وار جدید کاری: رام کرپال یادو
جدید بھارت نیوز سروس
پٹنہ، 31 دسمبر: معزز وزیر زراعت، بہار رام کرپال یادو نے کہا کہ بہار حکومت کسانوں کو ان کی پیداوار کی مناسب قیمت دلانے، ایک مضبوط اور شفاف مارکیٹ سسٹم تیار کرنے اور زرعی شعبے میں ویلیو ایڈیشن کو فروغ دینے کے لیے مسلسل ٹھوس اور دور رس اقدامات کر رہی ہے۔انہوں نے کہا کہ اسی مقصد کے تحت ریاستی حکومت نے ‘بہار ایگریکلچر ایکسلریشن مشن ‘ (Bihar Agriculture Acceleration Mission) اور ‘بہار ایگریکلچر انفراسٹرکچر مشن ‘ (Bihar Agriculture Infrastructure Mission) کے قیام کی منظوری دی ہے۔ ان دونوں مشنوں کا مقصد کسانوں کی مصنوعات کے اسٹوریج، پروسیسنگ، بہتر پیکیجنگ، مارکیٹنگ، زراعت پر مبنی اسٹارٹ اپس کی حوصلہ افزائی اور جدید زرعی مارکیٹ کے بنیادی ڈھانچے کی تعمیر کرنا ہے۔ اس سے نہ صرف کسانوں کی آمدنی میں اضافہ ہوگا بلکہ دیہی معیشت کو بھی نئی مضبوطی ملے گی۔
معزز وزیر نے کہا کہ بہار کو زرعی اسٹارٹ اپس کا مرکز بنانے، جی آئی (G.I.) ٹیگ یافتہ مصنوعات کے لیے مخصوص مارکیٹ تیار کرنے اور دیہی زرعی ہاٹ (بازاروں) کی بہتری کی سمت میں یہ ایک تاریخی اور انقلابی قدم ہے۔ ان دونوں مشنوں سے متعلق کاموں پر عمل درآمد ایگریکلچر مارکیٹنگ ڈائریکٹوریٹ کے ذریعے کیا جا رہا ہے۔انہوں نے کہا کہ معزز وزیر اعظم نریندر مودی جی کی دور اندیش رہنمائی اور مقبول وزیر اعلیٰ نتیش کمار جی کی مضبوط قیادت میں بہار حکومت کسانوں کی ہمہ جہت اور معاشی خودمختاری کے لیے ہر سطح پر مسلسل اور موثر کوششیں کر رہی ہے۔ حکومت کا واضح عزم ہے کہ کسان صرف پیدا کرنے والا ہی نہیں بلکہ خوشحال اور معزز شراکت دار بنے۔معزز وزیر نے بتایا کہ ریاست کے زرعی بازاروں (منڈیوں) کی مرحلہ وار جدید کاری اور مجموعی ترقی کی جا رہی ہے۔ گلاب باغ (پورنیہ)، مصلیٰ پور (پٹنہ)، آراء، حاجی پور، سمستی پور، مظفر پور، سیتامڑھی، موتیہاری، گیا، بیتیا، داؤد نگر اور موہنیا سمیت 12 زرعی پیداواری منڈیوں کی جدید کاری کے لیے 748.46 کروڑ روپے، جبکہ ساسارام، بیگوسرائے، کٹیہار، فاربس گنج، جہان آباد، دربھنگہ، کشن گنج، چھپرا اور بہٹا سمیت 9 منڈیوں کی ترقی کے لیے 540.61 کروڑ روپے کے پروجیکٹ منظور کیے گئے ہیں، جن پر کام جاری ہے۔
انہوں نے کہا کہ ان منڈیوں میں وینڈنگ پلیٹ فارم، دکانیں، وے برج، نکاسی آب کا نظام، انتظامی عمارت، مزدوروں کے لیے آرام گاہ، گیسٹ ہاؤس، مچھلی مارکیٹ، کیلا منڈی، سڑکیں، سولر پینل، ملازمین کے لیے کینٹین اور فضلے کو ٹھکانے لگانے والے (کمپوسٹنگ) پلانٹ جیسے جدید ڈھانچے تعمیر کیے جا رہے ہیں۔ اس سے کسان، تاجر، کاروباری افراد، پروسیسنگ یونٹس اور برآمد کنندگان ان منڈیوں کی طرف راغب ہوں گے، مقابلہ بڑھے گا اور کسانوں کو ان کی پیداوار کی زیادہ سے زیادہ قیمت ملے گی۔معزز وزیر نے اعتماد ظاہر کیا کہ یہ پہل بہار کو جدید زرعی مارکیٹنگ کے میدان میں ایک صف اول کی ریاست بنائے گی اور “خوشحال کسان –خوشحال بہار” کے عزم کو شرمندہ تعبیر کرے گی۔
