دبئی میں منعقدہ بین الاقوامی فوڈ فیسٹیول میں بہار کی نمائندگی: انجم آرا

پٹنہ، 03 جنوری: جے ڈی یو کی صوبائی ترجمان انجم آرا نے میڈیا میں جاری ایک بیان میں کہا کہ بہار کی خوشحال زراعت، روایتی غذائی مصنوعات اور ثقافتی ورثے کو اب عالمی سطح پر ایک نئی پہچان مل رہی ہے۔دبئی میں منعقد ہونے والے باوقار ‘گلف فوڈ فیسٹیول ‘ میں بہار کی جی آئی ٹیگ یافتہ مصنوعات اپنی منفرد شناخت اور معیار کے ساتھ دنیا کے سامنے پیش کی جائیں گی۔ یہ بہار کے کسانوں، کاریگروں اور روایتی تاجروں کے لیے ایک تاریخی موقع ہے۔اس بین الاقوامی فوڈ فیسٹیول میں سلاؤ کا کھاجا، متھلا مکھانہ، کترنی چاول اور مرچا دھان کی نمائش کی جائے گی۔ خاص بات یہ ہے کہ مٹھائیوں کے زمرے میں بہار سے صرف سلاؤ کے کھاجا کو ہی جی آئی ٹیگ حاصل ہے، جس کی وجہ سے اسے خاص طور پر منتخب کیا گیا ہے۔ اس سے واضح ہوتا ہے کہ بہار کی روایتی مصنوعات اب معیار اور شناخت کے عالمی پیمانوں پر پوری اتر رہی ہیں۔ ‘ایگریکلچرل اینڈ پروسیسڈ فوڈ پروڈکٹس ایکسپورٹ ڈیولپمنٹ اتھارٹی ‘ کے تعاون سے منعقد ہونے والے اس ایونٹ کا مقصد جی آئی ٹیگ یافتہ مصنوعات کی برآمدات کو فروغ دینا اور بین الاقوامی مارکیٹ میں ان کی مانگ کو مضبوط کرنا ہے۔ اس سے نہ صرف بہار کی مصنوعات کو نئی مارکیٹ ملے گی بلکہ اس کا براہِ راست فائدہ ریاست کے کسانوں، کاریگروں اور چھوٹے پروڈیوسرز تک پہنچے گا۔یہ اقدام بہار کی ثقافتی شناخت کو عالمی سطح پر قائم کرنے کی سمت میں ایک اہم قدم ہے۔ شاہی لیچی، زردالو آم، کترنی اور مرچا چاول، متھلا مکھانہ، سلاؤ کا کھاجا، مگہی پان، بھاگلپور سلک، مدھوبنی پینٹنگ، سوجنی کڑھائی، سِکی اور منجوشا آرٹ جیسی جی آئی ٹیگ یافتہ مصنوعات پہلے ہی بہار کی مخصوص شناخت بن چکی ہیں۔ ان مصنوعات کی وجہ سے نہ صرف ان کی قیمتوں میں اضافہ ہوا ہے بلکہ روایتی ہنر کو بھی عزت اور استحکام ملا ہے۔انہوں نے کہا کہ ریاست میں وزیر اعلیٰ جناب نتیش کمار کی حکومت اور مرکزی حکومت کی مشترکہ کوششوں سے بہار کی مصنوعات کو بین الاقوامی پلیٹ فارمز پر مسلسل نئی بلندیاں ملیں گی۔ یہ کامیابی بہار کے خود کفیل مستقبل کی طرف ایک مضبوط قدم ہے، جہاں کسان اور کاریگر عالمی مارکیٹ کا حصہ بن کر خوشحالی کی طرف گامزن ہوں گے۔