دہشت گرد اور بدنامِ زمانہ مجرم ہوں گے قید: سمراٹ چودھری
بھبھوا / ساسارام، 24 مارچ (یو این آئی):بہار کے نائب وزیر اعلیٰ سمراٹ چودھری نے منگل کے روز ایک عوامی جلسے سے خطاب کرتے ہوئے اعلان کیا کہ کیمور ضلع کے ‘ادھورا پہاڑ ‘ پر ایک جدید ترین ہائی سیکیورٹی جیل تعمیر کی جائے گی۔ اس جیل کا مقصد ریاست کے خطرناک ترین مجرموں اور دہشت گردانہ سرگرمیوں میں ملوث عناصر کو سخت پہرے میں رکھنا ہے۔وزیراعلیٰ نتیش کمار کی ‘سمردھی یاترا ‘ کے دوران کیمور میں منعقدہ ایک بڑے عوامی اجتماع سے خطاب کرتے ہوئے، انہوں نے ریاست میں گزشتہ دو دہائیوں میں ہونے والی ترقیاتی تبدیلیوں کا تفصیل سے ذکر کیا۔ سمراٹ چودھری نے کہا کہ ‘نیائے یاترا ‘، ‘پرگتی یاترا ‘ اور اب ‘سمردھی یاترا ‘ کے ذریعے بہار میں ترقی کی ایک مضبوط بنیاد رکھی گئی ہے۔ انہوں نے 2005 سے پہلے کے بہار کا موازنہ کرتے ہوئے کہا کہ آج ریاست کی تصویر مکمل طور پر بدل چکی ہے۔انہوں نے بتایا کہ کیمور میں ڈگری کالج کے بعد اب میڈیکل کالج کی تعمیر کی جا رہی ہے۔ ریاست میں سڑکوں کا جال 6 ہزار کلومیٹر سے بڑھ کر اب تقریباً 1 لاکھ 40 ہزار کلومیٹر تک پھیل چکا ہے۔نائب وزیراعلیٰ کے مطابق، بجلی کے صارفین کی تعداد 17 لاکھ سے بڑھ کر 2 کروڑ 16 لاکھ ہو گئی ہے۔ ریاست میں اب 24 گھنٹے بجلی فراہم کی جا رہی ہے اور 125 یونٹ تک مفت بجلی کی سہولت سے تقریباً 88 فیصد صارفین کا بل صفر (Zero) آ رہا ہے۔خواتین کو خود کفیل بنانے کے لیے 1 کروڑ 81 لاکھ خواتین کے کھاتوں میں 10 ہزار روپے منتقل کیے گئے ہیں۔ مزید برآں، گزشتہ پانچ برسوں میں 50 لاکھ لوگوں کو روزگار فراہم کیا گیا ہے اور اگلے پانچ سالوں میں ایک کروڑ مزید ملازمتوں کا ہدف مقرر کیا گیا ہے۔سمراٹ چودھری نے کیمور کی چار میں سے تین نشستوں پر این ڈی اے امیدواروں کو فتح دلانے پر مقامی عوام کا شکریہ ادا کیا اور بہار کو ایک انڈسٹریل ہب (صنعتی مرکز) بنانے کے عزم کا اعادہ کیا۔
