نئے ٹیکس سسٹم پر گمراہ کن خبر سے ہوشیار رہیں، وزارت مالیات نے انکم ٹیکس نظام میں کسی نئی تبدیلی سے کیا انکار
کچھ سوشل میڈیا پلیٹ فارمز پر یکم اپریل 2024 سے نئے ٹیکس نظام کے نفاذ سے متعلق خبریں گشت کر رہی ہیں۔ اس طرح کی خبروں کو پیش نظر رکھتے ہوئے وزارت مالیات کا ایک واضح بیان سامنے آیا ہے جس میں بتایا گیا ہے کہ یکم اپریل 2024 سے انکم ٹیکس نظام میں کوئی تبدیلی نہیں ہوگی۔
وزارت مالیات نے 31 مارچ یعنی اتوار کے روز سوشل میڈیا پلیٹ فارم ’ایکس‘ پر ایک پوسٹ کیا ہے جس میں لکھا ہے کہ ’’کچھ سوشل میڈیا پلیٹ فارمز پر نئی ٹیکس پالیسی سے متعلق گمراہ کن خبریں پھیلائی جا رہی ہیں، اس لیے یہ واضح کیا جاتا ہے کہ یکم اپریل 2024 سے کوئی نئی تبدیلی نہیں ہونے جا رہی ہے۔‘‘
وزارت مالیات کا کہنا ہے کہ نیا نظام مالی سال 24-2023 سے ڈیفالٹ نظام کی شکل میں کمپنیوں اور فرم کے علاوہ دیگر اشخاص کے لیے نافذ ہے اور اس کے مطابق اسسمنٹ سال 25-2024 ہے۔ وزارت مالیات نے ساتھ ہی کہا کہ نئے ٹیکس نظام کے تحت ٹیکس شرحیں بہت کم ہیں، حالانکہ پرانے نظام کی طرح مختلف چھوٹ اور تخفیف (تنخواہ سے 50 ہزار روپے اور فیملی پنشن سے 15 ہزار روپے کی ماہانہ تخفیف کے علاوہ) کا فائدہ دستیاب نہیں ہے۔ ٹیکس دہندہ حسب خواہش ٹیکس نظام (پرانا یا نیا) منتخب کر سکتے ہیں۔
نئے ٹیکس نظام سے باہر نکلنے کا متبادل متعین سال 25-2024 کے لیے ریٹرن داخل کرنے تک دستیاب ہے۔ وزارت مالیات نے ایک بیان میں کہا ہے کہ بغیر کسی کمرشیل آمدنی والے اہل اشخاص کے پاس ہر مالی سال کے لیے نظام منتخب کرنے کا متبادل ہوگا۔ اس لیے وہ ایک مالی سال میں نیا ٹیکس نظام اور دوسرے سال میں پرانا ٹیکس نظام منتخب کر سکتے ہیں، اور اس کے برعکس بھی انتخاب کر سکتے ہیں۔
