این ایچ ایم ملازمین کا 5 ماہ کی تنخواہ نہ ملنے پر احتجاج

سول سرجن دفتر کے باہر مظاہرہ، کام کے بائیکاٹ کی وارننگ

جدید بھارت نیوز سروس
رانچی، یکم جولائی:۔ رانچی صدر اسپتال میں خدمات انجام دینے والے نیشنل ہیلتھ مشن (این ایچ ایم) کے نرسنگ عملے اور دیگر ملازمین نے بدھ کے روز گزشتہ 5 ماہ سے تنخواہوں کی عدم ادائیگی کے خلاف سول سرجن دفتر کے باہر احتجاج کیا۔ مظاہرین کا کہنا تھا کہ مسلسل تنخواہ نہ ملنے کے باعث وہ شدید مالی مشکلات سے دوچار ہیں اور گھریلو اخراجات پورے کرنا بھی دشوار ہو گیا ہے۔ احتجاج میں شامل ملازمین نے بتایا کہ بعض کارکنوں کے پاس اسپتال آنے جانے کے کرائے تک کے پیسے نہیں بچے، اس کے باوجود وہ مسلسل اپنی ذمہ داریاں انجام دے رہے ہیں۔ ان کا الزام ہے کہ ہر بار جلد تنخواہ کی ادائیگی کا یقین دلایا جاتا ہے، مگر مسئلے کا کوئی عملی حل سامنے نہیں آتا۔ ملازمین نے خبردار کیا کہ اگر بقایا تنخواہوں کی ادائیگی جلد نہ کی گئی تو وہ کام کا بائیکاٹ کرنے پر مجبور ہوں گے۔ احتجاج کے دوران محکمہ صحت کے ایک افسر نے مظاہرین سے بات چیت کرتے ہوئے یقین دہانی کرائی کہ تنخواہوں میں تاخیر کی وجہ معلوم کر کے جلد مسئلے کا حل نکالا جائے گا۔ اس یقین دہانی کے بعد ملازمین فی الحال ڈیوٹی پر واپس لوٹ گئے، تاہم انہوں نے واضح کیا کہ مطالبات پورے نہ ہونے کی صورت میں آئندہ بڑا احتجاج کیا جائے گا۔