نومنتخب راجیہ سبھا رکن بیدھ ناتھ رام نے دیوڑی مندر میں پوجاکی

رانچی، 22 جون[جدید بھارت نیوز سروس] :۔ جھارکھنڈ سے راجیہ سبھا کے لیے منتخب ہونے کے بعد جھارکھنڈ مکتی مورچہ (جے ایم ایم) کے رہنما بیدھ ناتھ رام نے پیر کے روز اپنے اہل خانہ کے ہمراہ تماڑ میں واقع مشہور ماں سولہ بھوجی دیوڑی مندر کا دورہ کیا۔ اس موقع پر انہوں نے پورے مذہبی عقیدت و احترام کے ساتھ پوجا کی اور ریاست میں امن، خوشحالی اور عوامی فلاح و بہبود کے لیے دعا کی۔ مندر کے پجاریوں نے ویدک منتروں کے ورد کے ساتھ خصوصی پوجا کروائی۔پوجا کے بعد میڈیا سے گفتگو کرتے ہوئے بیدھ ناتھ رام نے کہا کہ یہ مندر ان کی عقیدت کا مرکز ہے اور وہ ہمیشہ موقع ملنے پر یہاں ماں کا آشیرواد لینے آتے ہیں۔ انہوں نے کہا کہ عوام اور پارٹی قیادت نے ان پر جو اعتماد ظاہر کیا ہے، وہ اس پر پورا اترنے کی مکمل کوشش کریں گے اور راجیہ سبھا میں ریاست کے مفادات سے جڑے مسائل کو مؤثر انداز میں اٹھائیں گے۔اس موقع پر تماڑ کے رکن اسمبلی وکاس کمار منڈا، جے ایم ایم کے متعدد عہدیداران، کارکنان اور حامی بھی موجود تھے۔ بیدھ ناتھ رام کی آمد کے پیش نظر مندر کے احاطے میں سیکورٹی کے سخت انتظامات کیے گئے تھے۔ بنڈو کے ڈی ایس پی اوم پرکاش کی قیادت میں پولیس کی بھاری نفری تعینات رہی، جس کے باعث پوجا کا عمل پرامن طریقے سے مکمل ہوا۔