جنگ بندی میں توسیع کے باوجود جنوبی لبنان پر اسرائیلی بمباری، حزب اللہ کے 30 ٹھکانوں کو نشانہ بنانے کا دعویٰ

بیروت، 18 مئی (یو این آئی) لبنان اور اسرائیل کے مابین دو روز قبل جنگ بندی میں توسیع کے باقاعدہ اعلان کے باوجود اسرائیلی فورسز کی جانب سے جنوبی لبنان کے مختلف شہروں اور دیہاتوں پر سلسلہ وار فضائی حملے کیے گئے ہیں۔ معروف نیوز چینل ،العربیہ، کی نامہ نگار کی رپورٹ کے مطابق، پیر کے روز کیے جانے والے ان تازہ فضائی حملوں میں خاص طور پر تبنین، مجدل سلم اور الزہرانی کے علاقوں کو نشانہ بنایا گیا ہے۔دوسری جانب، اسرائیلی فوج کے پریس آفس نے ایک بیان میں دعویٰ کیا ہے کہ اس نے گزشتہ 24 گھنٹوں کے دوران کارروائی کرتے ہوئے حزب اللہ کے 30 مختلف ٹھکانوں کو ہدف بنایا ہے۔ اسرائیلی عسکری بیان کے مطابق، ان فضائی آپریشنز میں حزب اللہ کے وہ جنگجو بھی مارے گئے ہیں جو جنوبی لبنان میں اسرائیلی فوجیوں پر حملوں میں ملوث تھے۔ واضح رہے کہ جنوبی لبنان اور مشرقی بعلبک کے بعض حصوں پر اتوار اور پیر کی درمیانی رات بھی شدید اسرائیلی بمباری کی گئی تھی، جبکہ اسی دوران جنگ بندی میں توسیع کا فیصلہ گزشتہ رات نصف شب سے نافذ العمل ہو چکا تھا۔اس کے باوجود، صور کے فضائی علاقے میں اسرائیلی ڈرون طیاروں کی پروازیں مسلسل جاری رہیں، جس کے باعث مقامی شہریوں میں شدید خوف و ہراس پھیل گیا اور لوگوں نے اپنے گھروں کو واپس لوٹنے کا ارادہ ترک کر دیا۔ لبنان کے سرکاری میڈیا کے مطابق، ہر بار جنگ بندی کے نفاذ کے باوجود ایسے ناگہانی حملوں کے خدشات برقرار رہنے کی وجہ سے ہی بے گھر ہونے والے لاکھوں افراد کی اپنے آبائی علاقوں میں واپسی کا عمل بری طرح متاثر ہو رہا ہے۔یاد رہے کہ گزشتہ جمعہ کو واشنگٹن کی جانب سے یہ باقاعدہ اعلان کیا گیا تھا کہ لبنان اور اسرائیل کے مابین جنگ بندی کی مدت میں مزید 45 دنوں کی توسیع کر دی گئی ہے۔ یہ اہم فیصلہ دونوں فریقین کے درمیان ہونے والے مذاکرات کے تیسرے دور کی کامیابی کے بعد سامنے آیا تھا۔ سفارتی مہم کے تحت یہ شیڈول بھی طے کیا گیا ہے کہ آنے والی 29 مئی کو امریکی محکمۂ دفاع (پینٹاگون) میں دونوں ممالک کے عسکری وفود کے مابین سیکیورٹی مذاکرات کا باقاعدہ آغاز ہوگا، جبکہ سیز فائر سے متعلق سیاسی نوعیت کے مذاکرات 2 اور 3 جون کو دوبارہ شروع کیے جائیں گے۔یہ تمام تر صورتحال اس وقت سے رفتہ رفتہ آگے بڑھی ہے جب امریکی صدر ڈونلڈ ٹرمپ نے گزشتہ 16 اپریل کی نصف شب سے لبنان اور اسرائیل کے درمیان ابتدائی طور پر 10 روزہ جنگ بندی کا اعلان کیا تھا، جس کی مدت میں بعد میں مرحلہ وار اضافہ کیا جاتا رہا۔ تاہم، ان تمام سفارتی کوششوں کے باوجود جنوبی لبنان اور بعلبک کے محاذ پر حملوں کا سلسلہ تھم نہیں سکا ہے، جبکہ دوسری طرف سے حزب اللہ کی جانب سے بھی شمالی اسرائیل اور جنوبی سرحدی پٹی پر اسرائیلی تنصیبات کے خلاف جوابی کارروائیاں برابر جاری ہیں۔