ایشان کشن نے جھارکھنڈ ٹی-20 کرکٹ لیگ کی ٹرافی کی نقاب کشائی کی

رانچی، 16 مئی (یو این آئی): جھارکھنڈ اسٹیٹ کرکٹ ایسوسی ایشن کی ملکیت اور ایس جے اپ لفٹ کے زیر انتظام جھارکھنڈ ٹی-20 کرکٹ لیگ نے رانچی کے ہوٹل ریڈیسن بلو میں منعقدہ ایک پروقار تقریب میں باقاعدہ طور پر اپنی لیگ ٹرافی کی نقاب کشائی کر دی ہے۔ ہندوستانی کرکٹر ایشان کشن بھی ٹرافی کی نقاب کشائی کے لیے وہاں موجود تھے۔اس تقریب میں جھارکھنڈ کے کرکٹ ایکو سسٹم کو مضبوط کرنے اور پورے خطے میں اس کھیل کو فروغ دینے کے لیگ کے عزم کی جھلک دیکھنے کو ملی۔ مونگیا اسٹیل لمیٹڈ کے مالک اور سی ایم ڈی ڈاکٹر گنونت سنگھ مونگیا نے بطورِ مہمانِ خصوصی شرکت کر کے تقریب کو رونق بخشی۔ تقریب میں اہم شخصیات، کرکٹ منتظمین، صنعت کاروں، کھیل کے شائقین اور متعلقہ افراد نے شرکت کر کے اس بہترین کرکٹنگ پلیٹ فارم کے آغاز کا جشن منایا۔اس لیگ کا انعقاد جھارکھنڈ اسٹیٹ کرکٹ ایسوسی ایشن کر رہی ہے اور اس کے تمام 27 میچ رانچی میں واقع جے ایس سی اے انٹرنیشنل کرکٹ اسٹیڈیم میں کھیلے جائیں گے۔ یہ ٹورنامنٹ 20 جون سے شروع ہو کر 14 دنوں تک جاری رہے گا۔ لیگ میں کل 6 فرنچائز ٹیمیں حصہ لے رہی ہیں جن کے نام رانچی کیپٹلز، جمشید پور اسٹیلرز، دھنباد کول کنگز، سنتھال اسٹرائیکرز، کولہان ٹائیگرز اور بوکارو پاور ہاؤس ہیں۔ ٹورنامنٹ کا افتتاحی میچ رانچی کیپٹلز اور بوکارو پاور ہاؤس کے درمیان کھیلا جائے گا۔کھلاڑیوں کی خریداری (نیلامی) کے لیے ہر ٹیم کا بجٹ 5 کروڑ روپے طے کیا گیا ہے۔ ٹورنامنٹ کے لیے 26 مئی کو کھلاڑیوں کا آکشن (نیلامی) ہوگا، جس میں انٹرنیشنل، آئی پی ایل، رنجی اور نوجوان کھلاڑیوں پر بولیاں لگائی جائیں گی۔