بھارت کے پاس تیل کے بڑے بڑے کنویں نہیں ہیں پیٹرول اور ڈیزل کا استعمال کم کرنا پڑے گا

مغربی ایشیا کے بحران کے درمیان وزیر اعظم کی عوام سے اپیل؛ تلنگانہ میں 9,400 کروڑ کے منصوبوں کا افتتاح

حیدرآباد، 11 مئی:۔ (ایجنسی) وزیر اعظم نریندر مودی نے عالمی سطح پر جاری توانائی کے بحران اور مغربی ایشیا میں کشیدگی کے پیش نظر ہم وطنوں سے پیٹرول، ڈیزل اور گیس کا استعمال انتہائی تحمل اور سوچ سمجھ کر کرنے کی اپیل کی ہے۔ اتوار کو حیدرآباد انٹرنیشنل کنونشن سینٹر (HICC) میں تلنگانہ کے لیے تقریباً 9,400 کروڑ روپے کے ترقیاتی منصوبوں کا افتتاح کرتے ہوئے انہوں نے واضح کیا کہ بھارت اپنی توانائی کی ضروریات کے لیے بڑی حد تک درآمدات پر منحصر ہے، اس لیے وسائل کا ضیاع ملک کے لیے نقصان دہ ثابت ہو سکتا ہے۔

سارا بوجھ حکومت نے خود پر لے لیا ہے
عوام سے خطاب کرتے ہوئے پی ایم مودی نے کہا، “ہمارے پڑوس میں ایک بڑی جنگ چل رہی ہے جس کی وجہ سے عالمی سطح پر تیل کی قیمتیں آسمان چھو رہی ہیں۔ بھارت کے پاس پیٹرول کے بڑے بڑے کنویں نہیں ہیں، ہمیں یہ باہر سے منگوانا پڑتا ہے۔” انہوں نے مزید کہا کہ عالمی قیمتوں میں اضافے کے باوجود حکومت نے عام شہریوں پر بوجھ نہیں پڑنے دیا اور مالی بوجھ خود برداشت کیا، لیکن اب وقت آگیا ہے کہ قوم متحد ہو کر اس چیلنج کا مقابلہ کرے۔
حب الوطنی کا نیا تصور: بچت اور فرض شناسی
وزیر اعظم نے حب الوطنی کی نئی تعریف بیان کرتے ہوئے کہا کہ صرف سرحد پر لڑنا ہی حب الوطنی نہیں، بلکہ ملک کے لیے جینا اور اپنا فرض نبھانا بھی حب الوطنی ہے۔ انہوں نے عوام سے کچھ اہم عہد لینے کی اپیل کی:

• جہاں میٹرو کی سہولت ہے، وہاں نجی گاڑیوں کے بجائے میٹرو کا استعمال کریں۔
• الیکٹرک گاڑیوں (EV) کے استعمال کو ترجیح دیں۔
• غیر ضروری سفر سے بچنے کے لیے ‘ورک فرام ہوم ‘ اور ‘آن لائن کانفرنسنگ ‘ کے کلچر کو دوبارہ اپنایا جائے۔
  توانائی کی حفاظت
  اور خود انحصاری کی سمت قدم
  تقریب کے دوران پی ایم مودی نے ملکاپور میں انڈین آئل کے نئے ٹرمینل کا افتتاح کیا، جسے انہوں نے بھارت کی توانائی کی حفاظت (Energy Security) کے لیے ایک اہم سنگ میل قرار دیا۔ انہوں نے بتایا کہ گزشتہ چند برسوں میں بھارت نے شمسی توانائی (Solar Energy) کے شعبے میں دنیا کے صفِ اول کے ممالک میں جگہ بنائی ہے اور پیٹرول میں ایتھنول کی آمیزش کے ہدف میں بھی غیر معمولی ترقی کی ہے۔ حکومت ایل پی جی کوریج اور سی این جی نیٹ ورک کو بھی وسعت دے رہی ہے تاکہ غیر ملکی تیل پر انحصار کم کیا جا سکے اور قیمتی زرمبادلہ بچایا جا سکے۔