سرایو رائے کا جڈکو کے خلاف محاذ:

وزیراعظم رہائشی منصوبے میں تاخیر پر CAG سے جانچ کا مطالبہ

جدید بھارت نیوز سروس
جمشیدپور ،28؍اپریل: موہردا میں واقع ’وزیراعظم رہائشی منصوبہ‘(PMAY) کے تحت مکانات کی تعمیر اور الاٹمنٹ میں ہونے والی تاخیر پر جمشید پور مغربی کے رکن اسمبلی سرایو رائے نے شدید برہمی کا اظہار کیا ہے۔ معائنے کے دوران انہوں نے واضح طور پر کہا کہ جڈکو (جھارکھنڈ اربن انفراسٹرکچر ڈیولپمنٹ کمپنی) کے طریقہ کار کی جانچ ہونی چاہیے اور وہ اس سلسلے میں ‘کمپٹرولر اینڈ آڈیٹر جنرل‘ (CAG) کو خط لکھیں گے۔سرایو رائے منگل کے روز موہردا پروجیکٹ سائٹ پہنچے تھے۔ انہوں نے بتایا کہ پیر کے روز بڑی تعداد میں مستحقین نے ان کے دفتر پہنچ کر شکایت کی تھی کہ مکانات مکمل طور پر تیار ہونے کے باوجود انہیں چابیاں نہیں دی جا رہی ہیں۔ اس کے بعد انہوں نے جائے وقوعہ کا دورہ کیا۔
پورے پروجیکٹ میں صرف 2 بلاک ہی مکمل ہو سکے: سرایو رائے
معائنے کے دوران سرایو رائے نے کہا کہ معاشی طور پر کمزور خاندانوں نے پیٹ کاٹ کر اس اسکیم کے تحت رقم جمع کی ہے۔ کئی لوگوں نے بینک سے قرض لیا ہے اور وہ بیک وقت بینک کی قسطیں (EMI) اور گھر کا کرایہ، دونوں بھرنے پر مجبور ہیں۔ اس کے باوجود انہیں مکانات کا قبضہ نہیں دیا جا رہا۔ انہوں نے حکومت کو وارننگ دیتے ہوئے کہا کہ جن لوگوں نے بجلی کے کنکشن کی رقم جمع کر دی ہے، وہ اب مزید انتظار نہیں کریں گے۔ جب پوری ادائیگی ہو چکی ہے، تو لوگ آہستہ آہستہ گھروں میں منتقل ہوں گے۔ حکومت غریبوں کا مذاق نہ اڑائے۔انہوں نے جڈکو پر سنگین الزامات لگاتے ہوئے کہا کہ ادارے کی لاپرواہی کی وجہ سے یہ منصوبہ برسوں پیچھے چلا گیا ہے۔ پورے پروجیکٹ میں اب تک صرف دو بلاک تیار ہو سکے ہیں، جبکہ کئی بلاکس میں ابھی صرف بنیاد کا کام چل رہا ہے یا تعمیر نامکمل ہے۔ بقیہ بلاکس کی تکمیل میں نہ جانے کتنے سال لگ جائیں گے۔
تیار فلیٹوں میں بجلی کنکشن میں تاخیر کیوں؟
انہوں نے سوال اٹھایا کہ تیار فلیٹوں میں بجلی فراہم کرنے میں تاخیر کیوں کی جا رہی ہے۔ رائے کے مطابق، بجلی کے محکمے کے حکام نے انہیں بتایا کہ جُسکو (JUSCO) یا جے این اے سی (JNAC) کی رسمی کارروائی مکمل ہوتے ہی چند منٹوں میں کنکشن دیا جا سکتا ہے۔ انہوں نے خود سیکرٹری سے بات کی ہے، جنہوں نے صورتحال واضح کرنے کے لیے دو دن کا وقت مانگا ہے۔
کسی وزیر یا وزیر اعلیٰ کے افتتاح کے انتظار میں روکے گئے مکانات
سرایو رائے نے خدشہ ظاہر کیا کہ شاید کسی وزیر یا وزیر اعلیٰ کے افتتاحی پروگرام کے انتظار میں مستحقین کو مکانات نہیں سونپے جا رہے ہیں۔ انہوں نے کہا کہ اگر صرف افتتاح کی رسم باقی ہے تو اسے آن لائن بھی کیا جا سکتا ہے، لیکن غریبوں کو مزید انتظار کروانا درست نہیں۔ انہوں نے دعویٰ کیا کہ فی الحال پروجیکٹ کے سات بلاک تنازعات اور بدانتظامی کا شکار ہیں، جبکہ تیار شدہ دو بلاکوں کے تقریباً 80 مستحقین بجلی کنکشن کے لیے تمام کارروائی مکمل کر چکے ہیں اور اب صرف میٹر لگنا باقی ہے۔