آئی پی ایل: ممبئی انڈینز کیلئے وانکھیڑے میں بقا کی جنگ

حیدرآباد کی طوفانی بیٹنگ روکنا بڑا چیلنج

ممبئی، 28 اپریل ( یو این آئی) انڈین پریمیئر لیگ کا 41واں میچ بدھ کے روز وانکھیڑے اسٹیڈیم میں کھیلا جائے گا، جہاں پانچ بار کی چیمپئن ممبئی انڈینز کا سامنا اس وقت زبردست فارم میں موجود سن رائزرز حیدرآباد سے ہوگا۔ ممبئی کے لیے یہ مقابلہ کرو یا مرو سے کم نہیں ہے، کیونکہ ٹورنامنٹ میں برقرار رہنے کے لیے انہیں اب ہر قیمت پر جیت درکار ہے۔سات میچوں میں صرف دو فتوحات کے ساتھ ممبئی کی ٹیم پوائنٹس ٹیبل پر انتہائی نازک پوزیشن میں ہے۔ کپتان ہاردک پانڈیا کی قیادت کے لیے یہ کڑا امتحان ہے کیونکہ ٹیم کی بیٹنگ اور بالنگ میں ہم آہنگی کا فقدان نظر آ رہا ہے۔ ٹیم کی امیدیں روہت شرما کے تجربے اور سوریا کمار یادو کی جارحانہ بلے بازی پر ٹکی ہیں۔جسپریت بمراہ کے علاوہ دیگر گیند بازوں میں وہ دھار نظر نہیں آ رہی جو حریف بلے بازوں کو دباؤ میں لا سکے۔ مڈل اوورز میں وکٹیں نہ لینا ممبئی کے لیے سب سے بڑا دردِ سر بن چکا ہے۔ دوسری جانب، پیٹ کمنز کی قیادت میں حیدرآباد نے اب تک شاندار کھیل پیش کیا ہے۔ آٹھ میچوں میں پانچ فتوحات کے ساتھ وہ پلے آف کی دوڑ میں مضبوطی سے شامل ہیں۔ابھیشیک شرما اور ٹریوس ہیڈ کی جوڑی حریف باؤلرز کے لیے ڈراؤنا خواب ثابت ہو رہی ہے۔ہینرک کلاسن اپنی جارحانہ بیٹنگ سے کسی بھی وقت میچ کا نقشہ بدلنے کی صلاحیت رکھتے ہیں۔ ٹیم اس سیزن میں کئی بار 200 سے زائد کا اسکور بنا کر اپنی بیٹنگ کی گہرائی کا ثبوت دے چکی ہے۔ اگرچہ موجودہ فارم حیدرآباد کے حق میں ہے، لیکن ریکارڈز بتاتے ہیں کہ گزشتہ چھ مقابلوں میں سے پانچ میں ممبئی نے حیدرآباد کو شکست دی ہے۔ تاہم، اس سیزن میں دونوں ٹیموں کی کارکردگی میں واضح فرق کی وجہ سے یہ ریکارڈز شاید زیادہ اہمیت نہ رکھیں۔ وانکھیڑے کی پچ روایتی طور پر بلے بازوں کے لیے سازگار سمجھی جاتی ہے جہاں باؤنڈریز چھوٹی ہیں۔ یہاں پہلی اننگز کا اوسط اسکور 187 رنز کے قریب رہا ہے۔پچھلے نو میچوں میں سے پانچ میچ دوسری بیٹنگ کرنے والی ٹیموں نے جیتے ہیں۔ اس لیے ٹاس جیتنے والا کپتان پہلے باؤلنگ کرنے کو ترجیح دے گا تاکہ شبنم کے اثرات اور لائٹس میں بیٹنگ کا فائدہ اٹھایا جا سکے۔ممبئی کے لیے یہ مقابلہ اپنے وجود کو بچانے کی لڑائی ہے، جبکہ حیدرآباد اپنی پوزیشن مزید مستحکم کرنے کی کوشش کرے گا۔ بلاشبہ، اس سنسنی خیز مقابلے میں سن رائزرز حیدرآباد کا پلہ تھوڑا بھاری دکھائی دے رہا ہے۔