بی جے پی کے ریاستی دفتر میں سنا گیا وزیر اعظم کا ‘من کی بات ‘ پروگرام

وزیر اعظم نے نوجوانوں کو ‘وکست بھارت ‘ اور ایجادات کیلئے کیا بیدار: آدتیہ ساہو

جدید بھارت نیوز سروس
رانچی ، 26؍ اپریل: بی جے پی لیڈروں اور کارکنوں نے ہرمو میں واقع پارٹی کے ریاستی دفتر میں ملک کے وزیر اعظم نریندر مودی کے پروگرام ‘من کی بات ‘ کے 133 ویں ایڈیشن کو پورے جوش و خروش کے ساتھ سنا۔ اس موقع پر ریاستی صدر آدتیہ ساہو، اپوزیشن لیڈر بابولال مرانڈی، جنرل سکریٹری کرم ویر سنگھ، مرکزی وزیر اناپورنا دیوی اور سابق ریاستی صدر ڈاکٹر دنیشانند گوسوامی خاص طور پر موجود تھے۔ اس دوران ریاستی صدر آدتیہ ساہو نے کہا کہ وزیر اعظم نے ‘من کی بات ‘ کے ذریعے نوجوانوں کو اختراع، سائنس اور قوم کی تعمیر میں سرگرم شرکت کی ترغیب دیتے ہوئے ‘وِکست بھارت ‘ (ترقی یافتہ ہندوستان) کے عزم کو مزید مضبوط کرنے کی اپیل کی ہے۔ وزیر اعظم کی متاثر کن باتیں ہمیں ہمیشہ ملک کی تعمیر کے کام میں مزید توانائی اور لگن کے ساتھ جٹنے کی ترغیب دیتی ہیں۔ اپوزیشن لیڈر بابولال مرانڈی نے کہا کہ وزیر اعظم کی بصیرت افروز رہنمائی 140 کروڑ ہم وطنوں کے ذہنوں میں ہمیشہ ایک نئی توانائی اور جوش و خروش پیدا کرتی ہے۔ ‘من کی بات ‘ ریڈیو پر نشر ہونے والامحض ایک پروگرام نہیں ہے، بلکہ ملک کے شہریوں کے اندر قوم کی تعمیر کے جذبے کو بیدار کرنے کا ایک مؤثر ذریعہ ہے۔ مرکزی وزیر اناپورنا دیوی نے کہا کہ ‘من کی بات ‘ کے ذریعے وزیر اعظم کے خیالات نے ہمیشہ قوم کی تعمیر، عوامی شراکت داری اور سماجی خدمت کے تئیں سب کو ترغیب دی ہے۔تنظیمی جنرل سکریٹری کرم ویر سنگھ نے کہا کہ پروگرام کے دوران وزیر اعظم نے گوتم بدھ کی زندگی کی مثال دیتے ہوئے کہا کہ “امن اندر سے شروع ہوتا ہے اور خود پر فتح ہی سب سے بڑی فتح ہے”، جو آج کے دور میں مزید متعلقہ ہے۔ اس کے علاوہ ریاستی نائب صدر راکیش پرساد، نیل کنٹھ سنگھ منڈا اور بال مکند سہائے، ریاستی جنرل سکریٹری امر کمار باوری، ریاستی وزراء سنیتا سنگھ، شالنی بائساکھیار اور دلیپ ورما، آرتی کجور، سبودھ سنگھ گڈو، اشوک بڑائک سمیت دیگر عہدیداران اور کارکنان موجود تھے۔