ایس آئی آر کے خلاف جھارکھنڈ تنظیم کی میٹنگ، ووٹ کے حق کے تحفظ پر زور

مسلم ووٹروں کے نام کاٹنے کی سازش ناکام بنائیں گے:شمشیر عالم

جدید بھارت نیوز سروس
رانچی ، 26؍ اپریل: رانچی، 26 اپریل 2026 جھارکھنڈ تنظیم کے مرکزی دفتر، مین روڈ واقع گلیکسی کمپلیکس، رانچی میں آج ایس آئی آر (SIR) کے حوالے سے ایک میٹنگ مرکزی صدر شمشیر عالم کی صدارت میں منعقد ہوئی۔ میٹنگ میں تنظیم کے مختلف عہدیداران، ضلعی صدور اور اراکین نے شرکت کی اور موجودہ حالات پر سنجیدگی سے تبادلہ خیال کیا۔ میٹنگ سے خطاب کرتے ہوئے مرکزی صدر شمشیر عالم نے کہا کہ ایس آئی آر کے نام پر مسلم ووٹروں کے نام ووٹر لسٹ سے کاٹنے کی ایک بڑی سازش رچی جا رہی ہے، جسے کسی بھی قیمت پر کامیاب نہیں ہونے دیا جائے گا۔ انہوں نے کہا کہ جمہوریت میں ووٹ کا حق ہر شہری کا آئینی حق ہے، اور اگر کسی کمیونٹی کو نشانہ بنا کر اس کے حق رائے دہی کو کمزور کرنے کی کوشش کی جاتی ہے، تو جھارکھنڈ تنظیم اس کی بھرپور مخالفت کرے گی۔
انہوں نے مزید کہا کہ تنظیم اس مسئلے کو انتہائی سنجیدگی سے لے رہی ہے اور اس کے خلاف ریاست گیر حکمت عملی تیار کی جا رہی ہے۔ تمام اراکین سے اپیل کرتے ہوئے انہوں نے کہا کہ وہ گاؤں گاؤں، محلے محلے جا کر لوگوں کو بیدار کریں، تاکہ کوئی بھی شخص اپنے حق سے محروم نہ رہے۔میٹنگ میں موجود مقررین نے ایس آئی آر سے ہونے والی ممکنہ پریشانیوں، چیلنجوں اور حل پر تفصیل سے اپنے خیالات کا اظہار کیا۔میٹنگ میں متفقہ طور پر فیصلہ کیا گیا کہ جھارکھنڈ تنظیم اس مسئلے پر وسیع عوامی بیداری مہم چلائے گی۔ آخر میں تمام اراکین نے تنظیم کی مضبوطی، سماجی اتحاد اور جمہوری حقوق کے تحفظ کے لیے مل کر جدوجہد کرنے کا عزم کیا۔اس موقع پر بنیادی طور پر ضلعی صدور، بلاک صدور، نمائندے اور تنظیم کے سینئر ارکان موجود تھے۔اس موقع پر خاص طور پر ضلعی صدر تنویر عالم، فہیم احمد، محمد عبدالرحمن، محمد حسن انصاری، محمد مستقیم، محمد عالم، محمد شاہنواز، عقیل اختر، محمد سرور اور امان سمیت کئی لوگ شامل تھے۔