جھارکھنڈ میٹرک کے نتائج میں کامیابی کا نیا ریکارڈ ، 95.27%طلباء پاس

4ٹاپرمیں 2 طالبات اور 2 طلباء شامل؛ 12 ہونہاروں نے ٹاپ 3میں بنائی جگہ

جدید بھارت نیوز سروس
رانچی، 23 اپریل:۔ جھارکھنڈ اکیڈمک کونسل (JAC) نے سال 2026 کے میٹرک کے نتائج کا اعلان کر دیا ہے، جس میں ریاست کی تعلیمی فضا میں ایک نئی تاریخ رقم ہوئی ہے۔ اس سال مجموعی کامیابی کا تناسب 95.27 فیصد رہا ہے، جو پچھلے سال (91.71 فیصد) کے مقابلے میں 3.5 فیصد زیادہ ہے۔ اس شاندار کامیابی میں جہاں بیٹیوں نے اپنی ذہانت کا لوہا منوایا، وہیں ہزاری باغ کے تعلیمی اداروں نے ایک بار پھر میرٹ لسٹ میں اپنی برتری ثابت کر دی ہے۔
میرٹ لسٹ میں ہزاری باغ کا جادو
اس سال کی میرٹ لسٹ میں ہزاری باغ کے اندرا گاندھی بالیکا ہائی اسکول کا جادو سر چڑھ کر بولا ہے۔ ٹاپ 3 کی فہرست میں شامل کل 12 طلباء میں سے 5 کا تعلق اسی ایک اسکول سے ہے۔ اس کے علاوہ رانچی، گملا، سمڈیگا اور سرائے کیلا کے ہونہاروں نے بھی اپنی صلاحیتوں کا لوہا منوایا ہے۔
ٹاپ 3 میں شامل 12 میڈھاوی طلباء (فیصد اور پوزیشن)

• ریاست میں پہلا مقام (99.60%): پرینشو کماری (ہزاری باغ)، شوانگی کماری (سمڈیگا)، پریم کمار ساہ (رانچی) اور سنی کمار ورما (رانچی)۔
• ریاست میں دوسرا مقام (99.20%): دیوانشو اراؤں (گملا)، کھلیش ساہ (گملا)، ویشنوی شری (ہزاری باغ) اور جولیتا منج (ہزاری باغ)۔
• ریاست میں تیسرا مقام (98.80%): مہتاب انصاری (نوا ٹانڈ)، پریت راج (اورمانجھی)، امیشا کماری (ہزاری باغ) اور دیپتی رانی (ہزاری باغ)۔
  اضلاع کی کارکردگی: گملا سب سے آگے
  اگر اضلاع کی کارکردگی کا موازنہ کیا جائے تو گملا ضلع نے 99.32 فیصد نتائج کے ساتھ ریاست میں پہلی پوزیشن حاصل کر کے سب کو حیران کر دیا ہے۔ دمکا (99.02%) دوسرے اور پاکوڑ (98.56%) تیسرے مقام پر رہا۔ دارالحکومت رانچی کا پاس فیصد 94.75 فیصد رہا۔
  بیٹیوں کا نمایاں کردار
  نتائج کے تجزیے سے یہ واضح ہوتا ہے کہ میرٹ لسٹ میں شامل 12 طلباء میں سے 7 طالبات ہیں، جو اس بات کا ثبوت ہے کہ جھارکھنڈ کی بیٹیاں تعلیم کے میدان میں لڑکوں سے بازی لے جا رہی ہیں۔ ہزاری باغ سے کل 6 طلباء میرٹ لسٹ میں جگہ بنانے میں کامیاب ہوئے، جبکہ رانچی سے 3، گملا سے 2، اور سمڈیگا و سرائے کیلا سے 1-1 طالب علم نے کامیابی حاصل کی۔
  یہ نتائج نہ صرف طلباء کی سخت محنت کا مظہر ہیں، بلکہ ریاست میں تعلیمی نظام کے بتدریج بہتر ہونے کی عکاسی بھی کرتے ہیں۔ حکومت اور محکمہ تعلیم نے اس شاندار کامیابی پر تمام کامیاب طلباء اور ان کے والدین کو مبارکباد پیش کی ہے۔