رام گڑھ سول کورٹ میں فائر سیفٹی موک ڈرل

سیشن جج توفیق الحسن نے آگ سے بچاؤ کی تربیت پر دیا زور

جدید بھارت نیوز سروس
رام گڑھ ، 17؍ اپریل: رام گڑھ سول کورٹ کے سیشن جج توفیق الحسن نے بطور مہمانِ خصوصی فائر سیفٹی ویک (آگ سے بچاؤ کے ہفتے) کے حوالے سے منعقدہ موک ڈرل پروگرام سے خطاب کرتے ہوئے کہا کہ ہر فرد کو آگ بجھانے کا علم ہونا ضروری ہے۔ انہوں نے فائر سیفٹی ڈیپارٹمنٹ کو ہدایت دی کہ ہر گھریلو خاتون کو، خاص طور پر گیس سلنڈر میں آگ لگنے کی صورت میں بچاؤ کی معلومات بڑے پیمانے پر ہونی چاہیے۔ اس کے لیے انہوں نے وسیع پیمانے پر تشہیر کرنے اور عام لوگوں کو بیدار کرنے کی ضرورت پر زور دیا۔ جمعہ کے روز رام گڑھ میں فائر سیفٹی ویک کے سلسلے میں ایک پروگرام کا انعقاد کیا گیا۔ فائر سیفٹی ڈیپارٹمنٹ کی جانب سے منعقدہ اس پروگرام میں سول کورٹ میں موجود لوگوں کو موک ڈرل کے ذریعے آگ سے بچاؤ اور گیس کے محفوظ استعمال کے طریقے بتائے گئے۔ اس موقع پر فائر آفیسر مہندر سنگھ، ہیڈ فائر ڈرائیور ونود کمار، شکل دیو یادو، راجندر گوپ اور دیگر اہلکاروں نے موک ڈرل کا عملی مظاہرہ کیا۔ اس تقریب میں رام گڑھ سول کورٹ کے پرنسپل سیشن جج توفیق الحسن، ڈالسا (DALSA) سکریٹری انیل کمار، جج انچارج ہرشت تیواری، اے ڈی جے ون وشال شریواستو، سی جے ایم آرتی مالا، شیویدی دویدی، اتم ساگر رانا سمیت سول کورٹ کے اہلکار بنیادی طور پر شریک تھے۔