پیپر لیک نہیں ہوا، جعلی پرچوں کے نام پر امیدواروں سے 10 سے 15 لاکھ روپے کی وصولی
جدید بھارت نیوز سروس
رانچی، 12 اپریل:۔ جھارکھنڈ میں پیپر لیک مافیا کے خلاف رانچی پولیس نے ایک بڑی اور منظم کارروائی کرتے ہوئے بین ریاستی گینگ کے مرکزی سرغنہ سمیت مجموعی طور پر 164 افراد کو گرفتار کر لیا ہے۔ گرفتار شدگان میں گینگ کے 5 سرگرم ارکان اور جھارکھنڈ ایکسائز کانسٹیبل تقرری امتحان 2023 کے 159 امیدوار شامل ہیں، جن میں 7 خواتین امیدوار بھی ہیں۔ اس کارروائی کو ریاست میں جاری امتحانی بدعنوانی کے خلاف ایک اہم پیش رفت مانا جا رہا ہے۔
خفیہ اطلاع پر چھاپہ
پولیس کو 11 اپریل 2026 کو خفیہ اطلاع ملی تھی کہ نامکم تھانہ علاقے کے ایک زیر تعمیر عمارت میں بڑی تعداد میں امیدوار مشتبہ حالت میں جمع ہیں اور وہاں غیر قانونی سرگرمیاں جاری ہیں۔ اطلاع کی بنیاد پر ایک خصوصی چھاپہ مار ٹیم تشکیل دی گئی، جس نے دیر رات کارروائی کرتے ہوئے موقع پر دھاوا بولا۔ پولیس کو دیکھتے ہی وہاں موجود افراد میں افرا تفری مچ گئی اور کئی لوگ فرار ہونے کے ساتھ ساتھ اہم دستاویزات اور سامان چھپانے کی کوشش کرنے لگے، تاہم پولیس نے مستعدی سے علاقے کی گھیرابندی کر کے سبھی کو حراست میں لے لیا۔ بعد ازاں عمارت کے دو کمروں میں تفصیلی تلاشی مہم چلائی گئی۔
ٹھگی کا بڑا انکشاف
ابتدائی تفتیش کے دوران یہ بات سامنے آئی کہ گینگ کے ارکان امیدواروں کو 10 سے 15 لاکھ روپے لے کر امتحان میں کامیابی دلانے کا جھانسہ دے رہے تھے۔ اس مقصد کے لیے سوال و جواب کے تیار شدہ سیٹ فراہم کیے جا رہے تھے اور امیدواروں کو انہیں رٹایا جا رہا تھا۔ جائے وقوع سے پرنٹر، جعلی سوالنامے، پھٹے ہوئے ایڈمٹ کارڈ، مشتبہ موبائل فون اور بینک چیک برآمد کیے گئے۔ یہ بھی انکشاف ہوا کہ پولیس سے بچنے کے لیے امیدواروں کے موبائل فون اور ایڈمٹ کارڈ پہلے ہی ضبط کر لیے گئے تھے، جبکہ کچھ امیدواروں نے گینگ کے نام پر بینک چیک بھی حوالے کیے تھے۔
کمیشن کی وضاحت اور سخت موقف
جھارکھنڈ اسٹاف سلیکشن کمیشن نے اس پورے معاملے پر وضاحت کرتے ہوئے کہا ہے کہ اصل امتحانی پرچہ لیک نہیں ہوا ہے اور ضبط شدہ سوالات کا حقیقی پرچے سے کوئی تعلق نہیں ہے۔ کمیشن کے چیئرمین پرشانت کمار نے واضح کیا کہ یہ مکمل طور پر ایک منظم دھوکہ دہی کا معاملہ ہے جس کے ذریعے امیدواروں کو گمراہ کر کے بھاری رقم وصول کی جا رہی تھی۔ کمیشن نے اعلان کیا ہے کہ گرفتار تمام امیدواروں کے خلاف سخت کارروائی کی جائے گی اور انہیں آئندہ امتحانات سے بھی نااہل قرار دیا جا سکتا ہے۔
سرغنہ کا مجرمانہ ریکارڈ اور مزید تفتیش
گرفتار سرغنہ اتل وتس، جو بہار کے جہان آباد کا رہنے والا ہے، اس کا مجرمانہ ریکارڈ نہایت سنگین بتایا جا رہا ہے۔ اس کا نام اس سے قبل بھی کئی ریاستوں میں ہونے والے پیپر لیک معاملات میں سامنے آ چکا ہے، جن میں راجستھان کلرک بھرتی امتحان 2017، نیٹ پیپر لیک 2024، بہار کمیونٹی ہیلتھ آفیسر بھرتی امتحان 2024 اور اتر پردیش کی مختلف بھرتی امتحانات شامل ہیں۔ پولیس کے مطابق اس معاملے میں نامکم تھانہ میں کیس درج کر لیا گیا ہے، جبکہ جائے وقوع سے 8 گاڑیاں بھی ضبط کی گئی ہیں۔ پولیس کی ٹیم اس پورے نیٹ ورک کی جڑ تک پہنچنے کے لیے مزید چھاپے مار رہی ہے اور دیگر ملزمان کی تلاش جاری ہے۔
