’وادھوانی انوویشن سینٹر‘ اور ’پروجیکٹ رینیو سوریا‘ کا گورنر نے کیا افتتاح
جدید بھارت نیوز سروس
دھنباد،6؍اپریل: گورنر سنتوش کمار گنگوار نے آئی آئی ٹی (آئی ایس ایم) دھنباد کے زیر اہتمام منعقدہ IInvenTiv-2026 کی افتتاحی تقریب سے خطاب کرتے ہوئے کہا کہ یہ تقریب بھارت کی اختراع، تحقیق اور مستقبل کی سمت متعین کرنے والا ایک اہم پلیٹ فارم ہے، جہاں تحقیق، اختراع، سرمایہ کاری اور پالیسی یکجا ہو کر ملک کی ترقی کو نئی سمت فراہم کر رہے ہیں۔گورنر موصوف نے کہا کہ بھارت کی مالامال علمی روایت نے ہمیشہ دنیا کی رہنمائی کی ہے اور آج بھی ملک اختراع پر مبنی ترقی کے ذریعے اس وقار کو دوبارہ حاصل کرنے کی سمت میں گامزن ہے۔ انہوں نے کہا کہ یہ تقریب اس سلسلے میں ایک اہم پیش رفت ہے، جہاں مختلف شعبوں کی اختراعات بھارت کی فکری صلاحیت کا بھرپور تعارف پیش کر رہی ہیں۔ انہوں نے مزید کہا کہ اس تقریب میں ملک کے مقتدر اداروں، اسٹارٹ اپس، صنعتی دنیا اور سرمایہ کاروں کی فعال شرکت ہے اور 150 سے زائد اعلیٰ صلاحیت والی اختراعات مصنوعی ذہانت (AI)، صحت، سیمی کنڈکٹر، میٹریل سائنس اور ارتھ سائنس جیسے اہم شعبوں میں نمائش کے لیے پیش کی جا رہی ہیں، جو بھارت کی بڑھتی ہوئی عالمی مسابقتی صلاحیت کی عکاسی کرتی ہیں۔ انہوں نے کہا کہ آئی آئی ٹی (آئی ایس ایم) دھنباد اپنی شاندار وراثت کے ساتھ ملک کے صفِ اول کے اداروں میں سے ایک ہے اور اختراع، تحقیق اور انٹرپرینیورشپ کے ذریعے قوم سازی میں اہم کردار ادا کر رہا ہے۔ انہوں نے یہ بھی ذکر کیا کہ ذاتی طور پر ان کا آئی آئی ٹی اداروں سے خاص لگاؤ رہا ہے، جس کی وجہ سے انہیں وہاں کی تعلیمی فضیلت، نظم و ضبط اور اختراعی ثقافت کو قریب سے سمجھنے کا موقع ملا ہے۔
“لیب سے لینڈ” تک کے سفر کو عملی جامہ پہنانے کا ذریعہ
گورنر نے کہا کہ یہ پلیٹ فارم “لیب سے لینڈ” تک کے سفر کو حقیقت بنانے کا ذریعہ ہے، جہاں سے نکلنے والے خیالات اور شراکت داریاں نئے اسٹارٹ اپس، ٹیکنالوجیز اور روزگار کے مواقع کی راہ ہموار کریں گی۔ انہوں نے کہا کہ موجودہ عالمی تناظر میں، جب دنیا متعدد چیلنجوں کا سامنا کر رہی ہے، ہمارے لیے یہ اور بھی ضروری ہو جاتا ہے کہ ہم اپنی صلاحیتوں کو مضبوط کرتے ہوئے ٹیکنالوجی، توانائی اور دیگر شعبوں میں خود کفیل بنیں اور دنیا کے لیے ایک قابلِ اعتماد شراکت دار کے طور پر ابھریں۔ انہوں نے کورونا وبا کے دوران بھارت کی جانب سے پیش کردہ انسانی اقدار اور عالمی تعاون کے جذبے کا بھی ذکر کیا۔
نوجوان علم، توانائی اور تخلیقی صلاحیتوں کو قوم سازی کے لیے استعمال کریں
گورنر موصوف نے کہا کہ “وکست بھارت @ 2047” کے ہدف کے حصول کے لیے ملک مسلسل آگے بڑھ رہا ہے اور آتم نربھر بھارت، اسٹارٹ اپ انڈیا، میک ان انڈیا، قومی تعلیمی پالیسی-2020 اور ڈیجیٹل انڈیا جیسی مہمات اختراع پر مبنی ترقی کو نئی جہت دے رہی ہیں۔ انہوں نے نوجوانوں سے اپیل کی کہ وہ اپنے علم، توانائی اور تخلیقی صلاحیتوں کو قوم کی تعمیر میں صرف کریں، نظم و ضبط اور مثبت سوچ کو اپنائیں اور اختراع کے ذریعے ملک کو نئی بلندیوں تک پہنچائیں۔ گورنر نے اس یقین کا اظہار کیا کہ IInvenTiv-2026 ملک کے اختراعی ماحولیاتی نظام کو نئی سمت دینے والا ایک سنگ میل ثابت ہوگا اور بھارت کو عالمی سطح پر تکنیکی اختراع کا قائد بنانے میں اہم کردار ادا کرے گا۔ انہوں نے اس تقریب کے لیے آئی آئی ٹی (آئی ایس ایم) دھنباد اور تمام معاون اداروں کو مبارکباد دی۔اس موقع پر گورنر موصوف کے ہاتھوں ‘وادھوانی انوویشن سینٹر‘اور ‘پروجیکٹ رینیو سوریا‘کا بھی افتتاح عمل میں آیا۔
