وقت آنے دو،مرکزی ایجنسیوں کے بریف کیس راز وقت پر کھولوں گی
بی جے پی پر جمہوریت، ووٹ اور بنگال کی شناخت چھیننے کا الزام
کولکاتہ: بنگال اسمبلی انتخابات 2026 کے بیچ وزیراعلیٰ ممتا بنرجی نے ایک بار پھر مرکزی ایجنسیوں اور بی جے پی پر کئی سنگین دعوے اور سخت وارننگ دی ہے۔ ایک عوامی خطاب میں ممتا بنرجی نے کہا کہ کچھ لوگ یہ سمجھتے ہیں کہ ہمیں کچھ معلوم نہیں، لیکن کہاں کہاں بریف کیس میں بھر کر کون سی مرکزی ایجنسی پیسے لے جا رہی ہے اور کس کے گھر میں داخل ہو رہی ہے، اس کی تمام معلومات انہوں نے بہت احتیاط سے جمع کر رکھی ہیں۔ ممتا نے واضح انداز میں کہا کہ وقت آنے پر وہ یہ سب کچھ عوام کے سامنے لے آئیں گی، لیکن ابھی وہ اس انکشاف کے لیے صحیح وقت کا انتظار کر رہی ہیں۔ انہوں نے طنزیہ انداز میں کہا کہ اتنی جلدی بھی کیا ہے، پہلے پوہیلا بیشاکھ گزرنے دیں، کچھ چیزیں وقت کے لیے بچا کر رکھنی پڑتی ہیں۔ وزیراعلیٰ کے اس بیان نے سیاسی حلقوں میں نئی ہلچل پیدا کر دی ہے، کیونکہ اسے مرکزی ایجنسیوں کے ممکنہ غلط استعمال اور انتخابی ماحول میں خفیہ سرگرمیوں سے جوڑ کر دیکھا جا رہا ہے۔ ممتا بنرجی نے صرف ایجنسیوں پر ہی نہیں بلکہ بی جے پی اور مرکز کی سیاست پر بھی براہِ راست حملہ کیا۔ انہوں نے کہا کہ جو لوگ بنگال کی بربادی چاہتے ہیں، ہم انہیں مٹا دیں گے۔ ان کا الزام تھا کہ یہ طاقتیں صرف حکومت حاصل کرنا نہیں چاہتیں بلکہ بنگال کے لوگوں کی جمہوریت، حقِ رائے دہی اور روزمرہ زندگی تک کو اپنے کنٹرول میں لینا چاہتی ہیں۔ ممتا نے عوام کو خبردار کرتے ہوئے کہا کہ وہ آپ کی جمہوریت چھین رہے ہیں، آپ کا ووٹ چھین رہے ہیں، اور ایک دن آپ کو ڈیٹینشن کیمپوں میں بھیج دیں گے۔ انہوں نے یہ بھی دعویٰ کیا کہ یہ لوگ عوام کی کھانے پینے کی آزادی تک محدود کرنا چاہتے ہیں اور آپ کو مچھلی اور انڈے تک کھانے نہیں دیں گے۔ ممتا بنرجی نے اپنے خطاب میں مذہبی اور سماجی ہم آہنگی کا سوال بھی زور سے اٹھایا۔ انہوں نے کہا کہ ان کے مذہب کا نام ادھرم ہے، جبکہ ہمارے مذہب کا نام انسانیت ہے۔ ان کے اس بیان کو بی جے پی کی نظریاتی سیاست کے خلاف براہِ راست حملہ مانا جا رہا ہے، جہاں وہ ایک بار پھر بنگالی شناخت، سیکولر سیاست اور عوامی طرزِ زندگی کو اپنے انتخابی بیانیے کے مرکز میں لا رہی ہیں۔ انتخابی موسم میں ممتا بنرجی کا یہ بیان نہ صرف سیاسی درجہ حرارت بڑھانے والا ہے بلکہ اس سے یہ بھی واضح ہو گیا ہے کہ ترنمول کانگریس اب آنے والے دنوں میں مرکزی ایجنسیوں، جمہوریت، ووٹ اور بنگالی تہذیب کے سوال کو بھرپور انتخابی ہتھیار بنانے جا رہی ہے۔ اب دیکھنا یہ ہے کہ پوہیلا بیشاکھ کے بعد ممتا بنرجی آخر کون سے بریف کیس رازسامنے لاتی ہیں اور اس کا انتخابی سیاست پر کیا اثر پڑتا ہے۔
