نبارڈ اسکیم کے تحت بہار کے گاؤں میں پلوں اور سڑکوں کا جال

پٹنہ، 2 اپریل (یو این آئی)محکمہ دیہی تعمیرات نے ریاستی اسکیم (نبارڈ )کے تحت رابطے کا ایک ایسا وسیع نیٹ ورک تیار کیا ہے، جس نے نہ صرف گاؤں کے فاصلوں کو ختم کیا ہے بلکہ ندیوں کی وجہ سے آمد و رفت میں حائل برسوں پرانی رکاوٹوں کو بھی ہمیشہ کے لیے دور کر دیا ہے۔،ندی نالوں اور خستہ حال کچی پگڈنڈیوں کی وجہ سے دہائیوں سے مرکزی دھارے سے کٹے ہوئے بہار کے دور دراز گاؤں کی صورتحال اب تیزی سے بدل رہی ہے۔ریاست میں نہ صرف پکی سڑکوں کا جال بچھایا جا رہا ہے بلکہ بہتر رابطے کے لیے پلوں کی تعمیر بھی کی گئی ہے۔ اس منصوبے سے اب آمد و رفت کا انحصار موسم پر نہیں رہا۔اس اسکیم کے تحت اب تک پوری ریاست میں 2,021 دیہی سڑکوں اور 1,271 پلوں کی تعمیر کی انتظامی منظوری دی گئی تھی، جس پر محکمے نے مستعدی دکھاتے ہوئے اب تک 1,898 سڑکوں کی تعمیر کا کام مکمل کر لیا ہے، جس سے ریاست بھر میں 4,845 کلومیٹر طویل پختہ سڑکیں تیار ہو چکی ہیں۔ سڑکوں کی تعمیر میں ضلع نالندہ میں سب سے بہتر کام کیا گیا ہے، جہاں سب سے زیادہ 203 راستے (370 کلومیٹر) عوام کے نام وقف کیے جا چکے ہیں۔ اس کے ساتھ ہی دارالحکومت پٹنہ کے دیہی علاقوں میں 157 سڑکیں (329 کلومیٹر)، گیا میں 120 سڑکیں (355 کلومیٹر) اور مونگیر میں 149 سڑکیں (203 کلومیٹر) بن کر مکمل طور پر تیار ہو چکی ہیں۔اس اسکیم کی اہم کامیابی ریاست میں 1,008 پلوں کی تعمیر کا مکمل ہونا ہے۔ بہار جیسی ریاست میں جہاں کئی اضلاع سیلاب اور ندیوں کے جال سے متاثر رہتے ہیں، وہاں ان پلوں کی تعمیر کسی لائف لائن سے کم نہیں ہے۔ خاص طور پر کوسی اور سیمانچل کے علاقوں میں ان پلوں نے بڑی راحت فراہم کی ہے۔اس منصوبے کے تحت ضلع ارریہ میں سب سے زیادہ 66 پلوں کی تعمیر مکمل کی جا چکی ہے۔ اسی طرح پورنیہ میں 62، نالندہ میں 62، کشن گنج میں 58 اور مدھوبنی میں 55 نئے پل اب لوگوں کو بلا تعطل سفر کی ضمانت دے رہے ہیں۔پہلے جہاں برسات کے دنوں میں لکڑی کے عارضی پلوں یا کشتیوں کے سہارے جان خطرے میں ڈال کر ندی نالے پار کرنے پڑتے تھے، وہاں اب پکے اور محفوظ پل بن چکے ہیں۔ہزاروں کلومیٹر طویل دیہی سڑکوں اور ایک ہزار سے زائد پلوں کے اس نیٹ ورک نے دیہی معیشت کو ایک نئی زندگی بخشی ہے۔ دیہی ترقی کے محکمے کی یہ کوشش صرف بنیادی ڈھانچے کی تعمیر تک محدود نہیں ہے بلکہ یہ دیہی علاقوں میں ہمہ جہت ترقی کو تیز کرنے کی ایک وسیع مہم ہے۔ نابارڈ کے تعاون سے جاری یہ اسکیم بہار کے دیہاتوں کو مرکزی دھارے سے جوڑتے ہوئے ایک بااختیار، خود کفیل اور ترقی یافتہ ریاست کی تعمیر میں اہم کردار ادا کر رہی ہے۔