ریچارج کی میعاد ختم ہونے کے بعد فون کال کی آمد روکنے کا مسئلہ راجیہ سبھا میں اٹھایا گیا

نئی دہلی، 11 مارچ (یو این آئی) ریچارج کی میعاد ختم ہونے کے بعد فون کال کی آمد روکنے کا مسئلہ بدھ کے روز راجیہ سبھا میں اٹھایا گیا، جس میں موبائل آپریٹرس کے ذریعہ اس منمانی پریکٹس پر پابندی لگانے اور آنے والی کال سروس کی ضمانت دینے کا مطالبہ کیا گیا عام آدمی پارٹی (اے اے پی) کے راگھو چڈھا نے وقفہ صفر کے دوران اس معاملے کو اٹھاتے ہوئے کہا کہ موبائل فون ان دنوں لوگوں کی لائف لائن بن چکے ہیں، لیکن آپریٹر اکثر ریچارج کی میعاد ختم ہوتے ہی آنے والی کال کو بند کر دیتے ہیں، جس سے فون سروس سے باہر ہو جاتا ہے۔ انہوں نے کہا کہ یہ مواصلات کے حق سے انکار کے مترادف ہے۔انہوں نے مطالبہ کیا کہ حکومت موبائل آپریٹرس کی منمانی کو روکنے کے لیے خصوصی قوانین بنائے، جس میں آخری ری چارج کے بعد تین سال تک انکمنگ کال جاری رکھنے، صرف انکمنگ کال کے لیے سستے پلان متعارف کرانے، اور اس بات کو یقینی بنانے کا التزام ہو کہ غیر فعال سم کارڈ کا نمبر تین سال تک کسی دوسرے کو دوبارہ تفویض نہ کیا جائے۔رکن پارلیمنٹ نے یہ بھی مطالبہ کیا کہ 28 دن کے ماہانہ ریچارج کی پریکٹس بند کی جائے اور ماہانہ ری چارج کو تیس دن تک بڑھایا جائے۔بی جے پی کے دنیش شرما نے نجی شعبے کے ملازمین کے لیے اپنے والدین کے انتقال پر سوگ کی چھٹی کا مطالبہ کیا۔ انہوں نے کہا کہ اس طرح کی چھٹی کناڈا جیسے ممالک میں دی جاتی ہے۔ انہوں نے کہا کہ مذہبی کتابوں میں والدین کی خدمت کو سب سے اہم بتایا گیا ہے اور ان کی آخری رسومات ادا کرنا لازمی فرض سمجھتے ہیں۔ اسے آئین کے تحت بنیادی حق قرار دیتے ہوئے انہوں نے مطالبہ کیا کہ ملازمین کو بامعاوضہ چھٹی کے علاوہ چھٹی دی جائے۔عام آدمی پارٹی کے اشوک کمار متل نے لوگوں کو بیرون ملک لے جانے کے بہانے دھوکہ دہی کی سرگرمیوں کا معاملہ اٹھایا۔ انہوں نے کہا کہ ہزاروں ہندوستانی جنوب مشرقی ایشیائی ممالک میں یرغمال بن کر رہ رہے ہیں۔ انہوں نے اس مسئلے سے نمٹنے کے لیے مستقل یکساں پروٹوکول کا مطالبہ کیا۔سماج وادی پارٹی کے رام جی لال سمن نے مطالبہ کیا کہ اسکول کے نصاب میں آئین کو لازمی مضمون کے طور پر پڑھایا جائے۔کانگریس کے نیرج ڈانگی نے ریلیوں اور دیگر تقریبات کے لیے عارضی ڈھانچوں کی تعمیر پر ہونے والے بھاری اخراجات کو روکنے کے لیے میدانوں میں مستقل ڈھانچوں کی تعمیر کا مطالبہ کیا۔ انہوں نے کہا کہ اس سے سرکاری فنڈ کی بچت ہوگی اور ایونٹ منیجمنٹ میں بہتری آئے گی۔ اس جگہ کو عوامی دلچسپی کے تمام ثقافتی اور مذہبی تقریبات کے لیے استعمال کیا جا سکتا ہے۔ انہوں نے کہا کہ اس مقصد کے لیے کثیر مقاصد کے مقامات کو پالیسی کے تحت تیار کیا جانا چاہیے تاکہ وسائل کے ضیاع کو روکا جا سکے۔آل انڈیا انا دراوڈ منیترا کزاگم (اے آئی اے ڈی ایم کے) کے تھمبی دورائی نے دارالحکومت میں سردار پٹیل مارگ پر ٹریفک جام کا مسئلہ اٹھایا۔ انہوں نے کہا کہ اس سڑک پر ہوٹلوں نے تجاوزات کر رکھی ہیں انہیں ہٹا کر سڑک کو چوڑا کرنے کی ضرورت ہے۔بیجو جنتا دل کی سلتا دیو نے صحت کی خدمات کے فقدان کا مسئلہ اٹھاتے ہوئے مطالبہ کیا کہ سرکاری اسپتالوں کی سہولیات میں اضافہ کیا جائے۔