ہندوستان کے اسٹریٹجک مفادات کولاحق خطرات سے خبردار کیا ‘‘
نئی دہلی، 10 مارچ (یو این آئی) انڈین نیشنل کانگریس نے پیر کو وزیر خارجہ ایس جے شنکر پر مغربی ایشیا میں جاری بحران کے حوالے سے ایک نامکمل پارلیمانی بیان دینے پر تنقید کی ہے، اور الزام لگایا ہے کہ حکومت ہندوستان کو درپیش اہم اسٹریٹجک، اقتصادی اور سفارتی خدشات کو دور کرنے میں ناکام رہی ہے پارٹی کے خارجی امورکے شعبہ کی جانب سے جاری کردہ ایک بیان میں، کانگریس نے 9 مارچ کو پارلیمنٹ میں وزیرموصوف کے بیان پر ’’شدید تشویش‘‘ کا اظہار کیا اور وزیر اعظم نریندر مودی کی قیادت میں حکومت پر خطے میں حالیہ پیش رفت پر مضبوطی سے جواب نہ دینے کا الزام لگایا۔پارٹی نے کہا، ’’انڈین نیشنل کانگریس بھارتیہ جنتا پارٹی کی حکومت کی جانب سے وزیر خارجہ ڈاکٹر ایس جے شنکر کے بے جان پارلیمانی بیان پر شدید تشویش کا اظہار کرتی ہے۔‘‘کانگریس نے الزام لگایا کہ یہ بیان ایرانی بحری جہاز ’آئی آر آئی ایس ڈینا‘ کے ڈوبنے کے واقعے پر احتجاج کرنے میں ناکام رہا، جسے پارٹی نے ہندوستان کا ’’اسٹریٹجک بیک یارڈ‘‘ قرار دیا۔ کانگریس کی دلیل تھی کہ اس خاموشی سے بحر ہند کے خطے میں ’نیٹ سکیورٹی پروائیڈر‘ کے طور پر نئی دہلی کے کردار کو نقصان پہنچ سکتا ہے۔پارٹی نے حکومت کو اس بات پر بھی تنقید کا نشانہ بنایا کہ اس نے جاری تنازع کے دوران جسے وہ ’’ایک خودمختار ملک کے سربراہ کی ٹارگٹڈ کلنگ‘‘ قرار دے رہی ہے ، اس کی مذمت نہیں کی۔ مزید یہ کہ، وزیرموصوف کا بیان اس بارے میں وضاحت سے عاری تھا کہ ہندوستان کس طرح بڑھتے ہوئے بحران کے معاشی اور جغرافیائی سیاسی نتائج سے نمٹنے کا منصوبہ رکھتا ہے۔
پارٹی کے مطابق، بیان میں ہندوستان کی اسٹریٹجک سرمایہ کاری کے تحفظ یا خام تیل کی درآمدات اور باسمتی چاول، یوریا اور کھاد جیسی برآمدات سمیت اہم تجارتی اشیا کی کسی رکاوٹ کے بغیر نقل وحمل کے تحفظ کے لیے کوئی ٹھوس تجاویز پیش نہیں کی گئیں۔ اس نے مغربی ایشیا میں مقیم ہندوستانی تارکین وطن کے تقریباً نو ملین (90 لاکھ) ارکان کی حفاظت اور بہبود پر بھی تشویش کا اظہار کیا۔پارٹی نے کہا، ’’وزیر خارجہ کا بیان اس بارے میں بھی کوئی حل پیش کرنے میں ناکام رہا کہ ہندوستان اپنی توانائی سکیورٹی کی ضروریات کو کیسے متنوع بنائے گا یا اپنی توانائی کی خودمختاری کو دوبارہ کیسے قائم کرے گا،‘‘ پارٹی نے مزید کہا کہ موجودہ انتظامات غیر ملکی طاقتوں سے متاثر ہو رہے ہیں، جن میں پابندیوں کے نظام کے تحت دی گئی عارضی چھوٹ بھی شامل ہے۔کانگریس نے مزید الزام لگایا کہ حکومت ہندوستان کے عالمی سفارتی قد کو کمزور کر رہی ہے۔ پارٹی کا دعویٰ ہے کہ وزیر اعظم کے حالیہ خارجہ پالیسی کے فیصلوں نے اس تاثر کو تقویت دی ہے کہ ہندوستان ترقی پذیر ممالک کے درمیان اپنا روایتی قائدانہ کردارترک رہا ہے۔پارٹی نے دلیل دی کہ حکومت کا یہ موقف ایک ایسے وقت میں ہندوستان کی ساکھ کو نقصان پہنچا سکتا ہے جب ملک برکس جیسے عالمی گورننس فورمز میں بڑا کردار ادا کرنے کی کوشش کر رہا ہے۔ اس نے کہا کہ وزیرموصوف کے ریمارکس بدلتے ہوئے عالمی نظام میں راستہ بنانے یا جغرافیائی سیاسی تناؤ کے اس دور میں ہندوستان کے مفادات کے تحفظ کے لیے کسی ’’منظم وژن‘‘ کی عکاسی نہیں کرتے۔اپنے بیان میں، کانگریس نے حکومت پرہندوستان کے سفارتی اداروں کو کمزور کرنے کا الزام بھی لگایا۔ اس نے دعویٰ کیا کہ مودی حکومت کی خارجہ پالیسی کے طریقہ کار اور جسے وہ ’’انڈین فارن سروس کی تذلیل‘‘ قرار دے رہی ہے ، اس سے آزادی کے بعد سے اب تک حاصل کی گئی دو طرفہ سفارتی کامیابیوں کے ختم ہونے کا خطرہ ہے۔یہ تنقید ایسے وقت سامنے آئی ہے جب مغربی ایشیا میں بڑھتے ہوئے تناؤ کے درمیان ہندوستان کی سفارتی پوزیشن اور معاشی اثرات پر سیاسی بحث تیز ہو رہی ہے—یہ ایک ایسا خطہ ہے جو ہندوستان کی توانائی کی درآمدات، تجارت اور وہاں کام کرنے والے لاکھوں ہندوستانی شہریوں کے روزگار کے لیے انتہائی اہمیت کا حامل ہے۔
