ہریہر گنج بلاک اور پلاموں ضلع میں بنیادی سہولیات کی بہتری پر توجہ
جدید بھارت نیوز سروس
پلاموں،10؍مارچ: مرکزی حکومت کے نیتی آیوگ کی جانب سے ‘سمپورنتا ابھیان 0.2 ‘ کا آغاز ہو چکا ہے۔ پلاموں نیتی آیوگ کے آکانشی ضلع (Aspirational Districts) میں شامل ہے، جبکہ پلاموں کا ہریہر گنج ‘آکانشی بلاک‘(Aspirational Block) میں شامل ہے۔ سمپورنتا ابھیان کے تحت 6 مختلف نکات تیار کیے گئے ہیں، جن پر ضلع انتظامیہ کام کر رہی ہے۔ پلاموں کے ہریہر گنج بلاک کو سمپورنتا ابھیان کے تحت آکانشی بلاک کے طور پر نشان زد کیا گیا ہے۔ ہریہر گنج بلاک جھارکھنڈ اور بہار کی سرحد پر واقع ہے، یہ علاقہ نکسلی سرگرمیوں کے لیے ملک بھر میں مشہور رہا ہے۔ 10 مارچ سے ہریہر گنج سمیت پورے ضلع میں سمپورنتا ابھیان 0.2 کا آغاز ہو رہا ہے۔ ڈی سی سمیرا ایس نے کہا کہ سمپورنتا ابھیان 0.2کی شروعات ہو چکی ہے۔ ضلعی سطح پر 10 مارچ کو اس مہم کے حوالے سے پروگرام منعقد کیے گئے ہیں۔ آکانشی بلاک ہریہر گنج سمیت پورے ضلع کے لیے کچھ اشارے (Indicators) طے کیے گئے ہیں۔ پلاموں ضلع کے ساتھ ساتھ ہریہر گنج بلاک کا انتخاب ’آکانشی بلاک‘ کے لیے کیا گیا ہے۔ اضافی غذائیت، چھوٹے بچوں کے وزن، آنگن واڑی میں پانی، بیت الخلا، اسکولوں میں لڑکیوں کے لیے بیت الخلا وغیرہ جیسے نکات پر کام کیا جانا ہے۔ ٹیکہ کاری (Vaccination) کے ہدف کو بھی مکمل کرنا ہے۔ ضلع انتظامیہ سمپورنتا ابھیان کے تحت تمام اشاریوں کے اہداف حاصل کرنے کے لیے کوشاں ہے۔
ضلع انتظامیہ اسکولوں میں بیت الخلا کی تعمیر کروائے گی
اس مہم کے تحت اسکولوں میں لڑکیوں کے لیے بیت الخلا کی فراہمی ضلع انتظامیہ کی بڑی ترجیح ہے۔ سمپورنتا ابھیان کے تحت ضلع انتظامیہ اسکولوں میں لڑکیوں کے لیے بیت الخلا تعمیر کروائے گی، ساتھ ہی ان کی صحت کی نگرانی بھی کی جائے گی۔ نیتی آیوگ کے سمپورنتا ابھیان کے تحت ضلع انتظامیہ کو صحت، غذائیت، تعلیم، زراعت، بنیادی ڈھانچہ اور مالی شمولیت (Financial Inclusion) پر کام کرنا ہے۔
غذائیت اور صحت کے حوالے سے منصوبہ تیار
پلاموں ضلع انتظامیہ نے غذائیت اور صحت کے حوالے سے علیحدہ منصوبہ تیار کیا ہے تاکہ حاملہ خواتین، بچوں اور لڑکیوں کو اس کا فائدہ مل سکے۔ پلاموں جیسے علاقے میں ‘کم وزن والے بچوں کی پیدائش‘(Low Birth Weight) کی شرح تقریباً چھ فیصد ہے۔ ضلع انتظامیہ کے اعداد و شمار کے مطابق گزشتہ ایک سال میں 4738 بچوں کی پیدائش ہوئی ہے، جن میں سے 303 بچوں کا وزن پیدائشی طور پر کم ہے۔ پلامو ضلع انتظامیہ سمپورنتا ابھیان کے تحت ‘لو برتھ ویٹ‘کے مسئلے کو ختم کرنا چاہتی ہے۔ پلاموں میں ٹیکہ کاری کی شرح 95 فیصد ہے۔
